Шара барысында "ӨТМК" АҚ президенті Әсем Мамутова мен Үндістан Қорғаныс министрлігінің мемлекеттік кәсіпорны Mishra Dhatu Nigam Limited (MIDHANI) компаниясының басқарма төрағасы доктор Динеш Кумар Ликхи ынтымақтастық туралы меморандумға қол қойды, оның шеңберінде титан биоимпланттары мен медициналық құралдар өндірісі саласындағы әріптестік ынтымақтастық нығая түспек.
Еліміздің тарапынан меморандумға қол қою шарасына Индустрия және инфрақұрылымдық даму вице-министрі Талғат Жанжүменов және Қазақстан Республикасының Үндістандағы Төтенше және Өкілетті елшісі Ерлан Әлімбаев қатысты.
"Өскемен титан-магний комбинаты" MIDHANI компаниясымен 2010 жылдан бастап әріптестік қарым-қатынас орнатқан. Қазіргі уақытта отандық кәсіпорын MIDHANI-ге медициналық бұйымдарды өндіру үшін кеуекті титанды және Eli титан қорытпаларын экспорттайды.
MIDHANI атом энергетикасы, аэроғарыштық, химиялық және мұнай-химия салалары үшін титан өнімдерін, сондай-ақ ASTM, BSI, ISO және BIS халықаралық ерекшеліктеріне сәйкес келетін және Үндістанның дәрілік заттарды бақылау басқармасы лицензиялаған әлемдік деңгейдегі титан биоимпланттары мен протездерін шығарады.
"ӨТМК" АҚ президенті Әсем Мамутованың айтуынша, комбинат үшін DefExpo India 2020 көрмесіне қатысу-бұл авиағарыштық және медициналық мақсаттағы титан өнімдерін өндіру және жеткізу, сондай-ақ құрамында титан бар шикізат өндіру саласындағы Үндістанның кәсіпорындарымен стратегиялық серіктестіктің негізін бекіту мүмкіндігі болып табылады.
"Өскемен титан-магний комбинаты" АҚ шикізат өндіруден бастап қосылған құны жоғары өнім шығаруға дейін бағытталған титан өндірушісі болып табылады. Комбинаттың тауарлық өнімінің негізгі түрлері: кеуекті титан, құймадағы алғашқы магний, титан құймалары мен қорытпалары. "ӨТМК"АҚ өнімдері әлемнің авиағарыштық саласының барлық өндірушілерімен сертификатталған. Қазіргі уақытта зауыт өнімінің 100%-ы АҚШ, Ұлыбритания, Ресей, Франция, Оңтүстік Корея, Үндістан және Қытай сияқты индустриялық дамыған елдерге экспортқа шығарылады.
Өткен жылы кеуекті титан өндірісінің көлемі 2018 жылмен салыстырғанда 44% - ға артса, титан құймалары мен қорытпалары өндірісінің көлемі 4% - ға өсті.
Қазіргі кезде компанияның 2033 жылға дейінгі даму стратегиясы әзірленді, оның шеңберінде бірқатар инвестициялық жобалар іске асырылуда. Осы бағдарламаның мақсаты шығарылатын өнімнің номенклатурасын кеңейту, титан өндірісін жаңа қайта бөлуді ұйымдастыру, сондай-ақ тиісті мамандарды даярлаумен өндірістік процестерді автоматтандыру және роботтандыру болып табылады.
