Осы тұрғыдан алғанда, 2019 жыл «Азаматтарға арналған үкімет» мемлекеттік корпорациясының Алматыдағы филиалы үшін жемісті болды. Корпорацияның Алматы филиалы былтыр 3 992 218 қызмет көрсетсе, оның 1 281 597-і электронды форматта ұсынылды. «Connectionpoint» өзіне-өзі қызмет көрсету секторы арқылы 2 999 808 қызмет алынып, 2 851 437 кеңес берілді. Бұрнағы жылмен салыстырғанда өз бетінше қызмет алатындар саны 88,9%-ға артқан.
Жақсылық Үшкемпіров сыйға тартқан
Автокөлік иелеріне жасалған жақсы бір қолайлылық – «Электронды үкімет» порталында көліктерді тіркеу және жүргізуші куәлігін алмастыру қызметтерінің іске қосылуы болса керек.
Дегенмен, әлде де халық үйреніп қалған әдетіне басып, мамандандырылған ХҚО-ға барғанды жөн санайды. Алматыда алғашқы мамандандырылған ХҚО ашылғалы бері автокөлік иелеріне көрсетілетін қызмет көлемі бес есе артты. Қала аумағының ұлғаюына байланысты Алматының халқы саны бір жарым есе өсті. Сондай-ақ мемлекеттік тіркеу нөмірін беруде экстерриториалды қағидасы енгізілгеннен кейін көлік саны арта түскен. Сондықтан Алматыда қосымша Мамандандырылған ХҚО-лар ашу қажеттігі туындады. Бүгінде қалада 6 МХҚО жұмыс істейді.
Нәтижесінде, былтыр Алматыда тағы да екі мамандандырылған ХҚО іске қосылса, Жетісу ауданында орналасқан №6 МХҚО-ны автокөлік иелеріне меценат, даңқты спортшы Жақсылық Үшкемпіров сыйға тартты. Ғимаратты «Жақсылық» спорт клубы ЖШС барлық шығындарын көтере отырып, ақысыз ұсынып отыр. 2019 жылғы 10 қыркүйекте іске қосылған орталық жыл соңына дейін 8349 өтінім қабылдап, 7084 көлікті тіркеп, 663 жүргізуші куәлігін берді. Электронды үкімет порталы арқылы 344 өтінім ресімделген.
Даңқты спортшының осындай игі ісі көпке үлгі. Жомарт жүректі тұлға енді ауданда автодром салып жатқан жайы бар.
Мүмкіндігі шектеулі азаматтарға кедергі жоқ
«Азаматтарға арналған Үкімет» мемлекеттік корпорациясы арқылы мүмкіндігі шектеулі азаматтарға да көп көңіл бөліне бастағаны қуантады. Мұндай жандарға мемлекеттік қызметтерді алуға ыңғайлы болу үшін филиалдың барлық кіреберісінде «мүмкіндігі шектеулі тұлғалар үшін қызметкерді шақыру түймесі» және пандустар бар. Брайль мәтіні бар ақпараттық белгілер, көру қабілеті нашар адамдарға арналған тактильді жолдар орнатылған.
Алматы қаласының ХҚКО-да мүмкіндігі шектеулі 52 қызметкер жұмыс істейді. Жұмысқа қабылдауда да жеңілдіктер қарастырылған. Есту, сөйлеу қабілеті шектеулі жандарға онлайн сурдоаударма қызметі көрсетіледі. Ымдау тілінің білікті маманы нақты уақыт режімінде арнайы қосарлы монитормен ымдау тіліне аудару арқылы түсіндіруді қамтамасыз етеді. I-II топтағы мүмкіндігі шектеулі азаматтардың үйіне барып қызмет көрсетіледі. Ол үшін 1414 нөміріне қоңырау шалып өтінім қалдырады. Тұрақты негізде үйде мүмкіндігі шектеулі адамдарға қызмет көрсету бойынша мониторинг жүргізіледі.
55 түрлі мемлекеттік қызмет біріктірілді
Жаңа бағыттардың бірі – қызметтер клиенттерді өздері табатын проактивті қағидатының енгізілуі. Мысалы, жаңа туған нәрестенің ата-аналарына баланың туу туралы куәлігін, әлеуметтік жәрдемақылардың екі түрін ресімдеу үшін SMS-хабарламаға жауап беру жеткілікті. Сондай-ақ SMS арқылы зейнетке шығуға, мүгедектікті ресімдеуге және «Алтын алқа», «Күміс алқа» алқаларымен марапатталған көп балалы аналарға жәрдемақы тағайындауға байланысты қызметтерді алуға болады.
Жақын арада белсенді қызметтер саны 17-ге дейін артады. Олар бұған дейін дәстүрлі түрде көрсетіліп келген 27 мемлекеттік қызметті біріктіреді. Ең бастысы, «бір терезе» іспетті, «бір өтініш» ұстанымы жұмысты жеңілдете түспек. Мысалы, қазір зейнетке «бір өтінішпен» шығуға болады. Бұрын ол үшін ХҚО-ға үш рет барып, төрт түрлі өтініш жазуға тура келетін. Енді 55 түрлі мемлекеттік қызмет 21 композиттік қызметке біріктіріледі.
Мұндай қызметтердің арасында Жерге акт алу сұранысқа ие болады. Қазір жерге актіге төрт түрлі өтініш беруге тура келеді, енді барлық төрт акт бір қызметке біріктіріледі – сәйкестендіру құжаттарын дайындау және беру, бұл egov.kz порталында да қолжетімді.
Тағы бір жаңалық, енді азаматтық хал актілерін кез келген аймақта тіркеуге болады. Жаңашылдық баланың тууына, некені тіркеу мен ажырасуға, аты-жөні мен тегін өзгертуге, қайтыс болу құжаттарын тіркеу сияқты қызметтерді қамтиды. Мәселен, бұрын азаматтар аталған мемлекеттік қызметтерді алу үшін тұрғылықты тіркеу орны немесе тіркеу жазбасының орналасқан жері бойынша мемлекеттік корпорацияның фронт-офистеріне немесе АХАТ бөліміне хабарласатын. Енді азаматтық хал актілеріне қатысты 5 түрлі қызметті кез келген ХҚО-дан немесе АХАТ-тан алуға болады. Бұл керекті құжаттарды аз уақыт ішінде алуға және сыбайлас жемқорлық деректерін болдырмауға мүмкіндік береді.
Бұрын құжаттарды ресімдеу үшін өтініш беруші тіркеу орны бойынша халыққа қызмет көрсету орталықтарына немесе тіркеуші органға хабарласып, 5-30 күнге дейін жауап күтетін еді. Мәселен, егер азамат бір аймақта тегін өзгерту туралы өтініш білдірсе, мемлекеттік орган өзге аймақтан – оның туған жерінен қосымша мәліметтерді сұрататын.
Жалпы, заңға ұсынылған түзетулердің 70%-ы мемлекеттік қызметтерді оңтайландыру мен автоматтандыруға мүмкіндік береді. Электронды форматқа көшу құжаттарды қабылдау уақыты мен оның санын қысқартады, әкімшілік кедергілерді жояды және қызметтерді алу процесін жеңілдетеді.
Сондай-ақ ХҚО мамандары қызмет алушылардың телефондарына telegram және Mgov қосымшаларын орнатуға көмектеседі, түрлі анықтамалар мен қызметтерді алу тәртібін түсіндіреді. Қазіргі уақытта телеграм-бот (@EgovKzBot) арқылы мемлекеттік қызметтің 25 түрі, mGov.kz мобильді қосымшасы арқылы білім беру, отбасы, жылжымайтын мүлік, денсаулық сақтау сынды басқа да салалардағы 90-ға жуық мемлекеттік қызмет қолжетімді. Бүгінде тізілімде бар 723 мемлекеттік қызметтің 580-і электронды форматта қолжетімді.
Қысқасы, Азаматтарға арналған үкімет «Қалтадағы ХҚО» қағидаты бойынша әрекет етеді.
АЛМАТЫ
