Бүгінге дейін Қытай Халық Республикасының провинцияларында коронавирустық пневмония жұқтырған 40 мыңнан астам (42 638) адам тіркеліп, оның 1016-сы қайтыс болған және 3 мыңнан астам науқас (3 996) емделіп шыққан.
«Әлемнің 27 елінде 448 адамнан коронавирустық инфекция анықталды. Дегенмен, Қытайда аталған вирустың таралу қарқыны 31 қаңтар мен 11 ақпан аралығында 3,6 есеге төмендеді (22 пайыздан 6,1 пайызға дейін). Яғни, Қытайда эпидемиологиялық жағдайдың тұрақталып келе жатқаны байқалады. Ал Қазақстанда коронавирустық инфекцияға қарсы күрес шаралары аясында 6 қаңтардан бері мемлекеттік шекаралардағы пункттерде 260 885 адам тексеруден өтті, оның 30 852-сі Қытайдан келген. Жалпы, дене қызуы жоғары және жедел респираторлық-вирустық инфекцияның симптомдары бар 140 адам ауруханаға жатқызылды, оның 113-і емделіп шықты, 27-сі стационарда. Науқастардың ешқайсысынан коронавирустық инфекция анықталған жоқ. Медициналық ұйымдар Қытайдан келген 23 059 адамның денсаулығына тұратын жері бойынша 14 күн бойы мониторинг жасайды. Бүгінде инкубациялық кезеңнің аяқталуына байланысты 15 478 адам мониторингтен алынды, 8 690 адам медициналық бақылауда тұр. Ешкімде коронавирустық инфекцияға күдік тіркелген жоқ», деді Бас мемлекеттік санитарлық дәрігер.
Сонымен қатар ол Премьер-Министрдің орынбасарының төрағалығымен елімізде коронавирустық инфекцияның пайда болуы мен таралуына жол бермеу жөніндегі іс-шараларды үйлестіру жөнінде ведомствоаралық комиссия құрылғанын, оның құрамына барлық мүдделі мемлекеттік органдар мен облыстардың және Нұр-Сұлтан, Алматы және Шымкент қалаларының әкімдіктері кіргенін тілге тиек етіп, коронавирустық инфекцияның әкелінуі мен таралуына жол бермеу жөніндегі іс-шаралар жоспары іске асырылып жатқанын алға тартты.
«ҚХР Ухань қаласынан Ресей Федерациясына (Түмен облысы – 3 адам) және Өзбекстан Республикасына (5 адам) эвакуацияланған Қазақстан Республикасы азаматтарының жағдайы қанағаттанарлық, дене қызуы жоқ, ЖРВИ белгілері мен шағымдары анықталған жоқ. Сондай-ақ бүгін таңертеңгі сағат 6:05-те Нұр-Сұлтан қаласына Қытайдың 36 қаласынан 217 қазақстандық азамат келді. Барлығы медициналық және зертханалық тексеруден өту үшін кемінде 3 күн мерзімге ауруханаға жеткізілді. Денсаулық жағдайы қанағаттанарлық», деді Жандарбек Бекшин.
