«Әлбетте мұндай оқиға кезіндегі басты құрал – ресми түсіндірме беру. Ақпаратты барынша шұғыл беру керек. Бірақ мұндайда келесі проблемамен бетпе-бет келеміз: уатсаппен тарайтын арандататушы, дауыспен тарайтын хабарлама бүкіл чаттарға 20 минуттың ішінде тарап кетуі мүмкін. Ал бұл хабарламаны растау немесе жоққа шығару үшін одан ұзақ уақыт керек. Атап айтқанда ол үшін оқиға орнына шығып, ақпараттың шын-өтірігін тексеріп, себептерін анықтау керек. Әлбетте, бұл уақытта қажет етеді», - деді Дәурен Абаев.
Бұл Қазақстанда ғана емес, әлем елдері үшін де өзекті тақырып болып отыр.
«Оның тың мысалын коронавирусқа қатысты жалған ақпараттан-ақ көруге болады. Дүниежүзілік денсаулық сақтау ұйымы жалған ақпараттарға қарсы тұру үшін «Google» компаниясына жүгінуіне тура келді. Сол себепті мұндай провакациялық жайлармен күресудің ең тиімді әрі ұзақ мерзімді механизмі – ақпаратты тұтыну мәдениеті. Біз сол үшін әрдайым ақпараттық гигиена мәселесін жиі көтереміз. Туысы немесе көршісі бір жіберген ақпаратқа сеніп қалмай, оқиғаның ресми түсіндірмесін күткен адам ғана ақпараттық гигиенаны сақтай алады», - дейді министр.
Оның айтуынша, халық кез келген жаңалықты сенімді ақпарат көзінен бақылап отыруға тиіс. Сондықтан медиялық сауаттылықты арттыру бойынша Ақпарат және қоғамдық даму министрлігі Білім және ғылым министрлігіне мектеп қабырғасынан бастап жүзеге асыруға болатын қанат қақты жоба ұсынбақ.
