Қоғам • 20 Ақпан, 2020

Сақтыққа салғырт емес

310 реткөрсетілді

«Сақтықта қорлық жоқ». Қытайдан тараған вирус аз уақытта әлемнің 25-тен астам еліне тарап, 70 мыңнан аса халық зардап шегіп отыр. Күн­нен-күнге күшейіп бара жатқан індет іргедегі бізге жетпегені, әри­не қуантады. Оған елімізде сақтық шаралары себеп болса керек. Әуе­жай­ларда алдын алу шаралары жүргізілуде. Ал Қытайдан күні кешеге дейін оқшауланған күйде елге оралған отандастарымыздың риза­шылығы бөлек.

Бүгінде Қытаймен арадағы ше­кара­лар жабылып, әуе, темір жол тасымалдары тоқтатылғаны мәлім. Дегенмен, тасымал өзге ел­дермен қалыпты жүріп жатыр. Х­алық­аралық әуе рейстері қан­ша­лықты қадағаланып, жолаушылар санитарлық тексерістен өтіп жатыр? Осы сауалға жауап іздеп Денсаулық сақтау министрлігінің Көліктегі тауарлар мен көрсетілген қыз­меттің сапасы мен қауіпсіздігін бақылау департаментіне хабарластық. «Мем­лекеттік шекараларда, әуежайларда, те­ңіз порттарында және темір жол өткізу пункт­терінде байланыс­сыз термометрия жүйелерін қол­дана отырып, сұрау салу жолымен халықаралық рейстермен кел­ген азаматтарға санитарлық-каран­тиндік бақылау күшейтілді. Әуе, те­ңіз кемесінің бортында және жолаушылар пойызында коронавирус инфекциясына күдікті науқас анықталған кезде әуежайларда, теңіз порттарында және темір жол өткізу пункттерінде эпидемияға қарсы іс-шараларды ұйым­дастыру бойынша санитарлық-каран­тиндік пункттердің кезекші маман­да­рының іс-қимыл алгоритмдері әзірленіп, бекітілді. Қазақстанның  Бас мем­лекеттік  санитариялық дәрігерінің 2020 жылғы 3 ақпандағы №2 қау­лысы бойынша барлық өткізу пункт­терінде оқу-жаттығу сабақта­ры, ведомстволар мен ұйымдардың мамандары арасында семинарлар  өткізілді. Мемлекеттік шекарадағы бақылау орган­дарының қызметкерлеріне коронавирус инфекциясы таралуының профилактикасы және алдын алу шаралары бо­йын­ша нұсқама беріл­ді. Жолаушылар арасында КВИ профилактикасы бойынша дауыс­ зорайтқыш байланыс арқылы жүр­гізілуде», дейді Нұр-Сұлтан қаласы Санитарлық-карантиндік бақылау бөлі­мінің басшысы Дәрия Әзімбаева.

Оның айтуынша, барлық халық­аралық рейстермен келген жолаушы­ларды борттан шығармастан термо­метрия жүйелерімен түгелдей тек­середі. Олар 4 тілде арнайы дайындалған сауалдама­ны толтырады. Бұл жолаушылардың мәлі­меттерін толық алу үшін керек. Ал жолаушылардың арасында Қытай азаматтары болса, тұратын мекен- жайында  14 күн бойы медициналық қадағалауда болады. «Қазақстанның Бас мемлекеттік санитариялық дәрі­гері орынбасарының 2020 жылғы 17 ақпандағы №5 қаулысы бо­йынша 20 ақпаннан бастап Қытай Халық Республикасынан келген адамдарды 14 күн бойы өңірлік провизорлық стационарда оқшаулай отырып, кейіннен медициналық-санитариялық алғашқы көмек ұйым­дарында медициналық ба­қылау арқылы тұрғылықты жері бойынша шығарылғаннан кейін 10 күн бойы ка­рантинді (күн сайын қоңырау шалу) тексеру көзделіп отыр. Сонымен қатар коронавирустық инфекция тіркелген елдерден  келген адамдарды Қазақстанның  шекарасынан өткен күннен бастап ме­дициналық-санитариялық алғашқы көмек көрсету бойынша орта буынды медицина қызметкерінің үйге күнделікті баруы арқылы 14 күн бойы үй карантинін (өзін өзі оқшаулауды) және одан әрі 10 күн ішінде тұратын жері бойынша медициналық бақылауда (күн сайынғы қоңырау шалу арқылы) болады», дейді  Д.Әзімбаева.

Қытаймен арадағы әуе тасымалы тоқтаған 3 ақпаннан бастап Нұр-Сұлтан әуежайына Қытайдың 50 азаматы ұшып келген. Олардың барлығы аумақтық департаменттерге медициналық бақылау жүргізу үшін жіберілген. Қазірге дейін олардың арасында дене қызуы жо­ғары адамдар болмаған.

Жақында Бейжіңнен бір топ отан­дасымыз елге оралды. Олардың арасында Бейжіңдегі Орталық ұлттар уни­верситетінің докторанты, жерлесіміз Жұл­дыз Бекбауова болды. «Қытай астанасы Бейжіңге жиналған 217 қазақстандық Қа­зақстан мен Қытай Үкіметі, Сырт­қы істер министрлігі және Қазақ­станның Қытайдағы елшілігі қа­тарлы мемлекеттік мекемелердің кірісуімен арнайы бортпен 11 ақ­пан күні Нұр-Сұлтанға келдік. Біз Бейжіңге түрлі қаладан жиналдық.  Арнайы кесте болды. Сол бойын­ша жүріп-тұрдық. Әуежайға дейін арнайы көлікпен бардық. Борт­қа отырғанға дейін елшілік қыз­меткерлері біздің қызметімізде бол­ды. Ұшақта да сақтық шаралары ерек­ше жасалыпты. Бортсеріктер де арнайы киім киген. Нұр-Сұлтанға жеткенше бізді алып қайтуға барған қазақстандық дәрігерлер температурамызды жарты сағат сайын өлшеп, жағдайымызды жеке-жеке сұрап отырды. Маскаларды да жиі ауыстырып тұрдық. Нұр-­Сұл­танға қонғаннан кейін әуе­жайға кіргізген жоқ. Төтенше жағ­­дай кезінде шығатын жолмен шық­тық. Бізді жедел жәрдем қыз­мет­керлері, дәрігерлер, тәртіп сақ­­шыларынан құралған арнайы топ қарсы алды. Бізді ешкіммен жа­қын­дастырмаған бойы қаладан 7 шақырым қашықтықта орналасқан Көпбейінді медициналық орталық алып кетті. Онда тізіміміз алдын ала дайындалған екен. Сол бойын­ша дайын орындарға орналастық. Медициналық қызмет тиімді, жылдам, сапалы ұйымдас­тырылған. Өзіміздің заттарымызды түгел­дей алып қалып, дезинфекциялады. Бар­­лығымыз анализ тапсырдық. Бағымызға қа­рай келгендеріміздің ешқайсысында тем­пература көтерілу сияқты белгілер болған жоқ. Өйткені біздің біреуіміз ауыратын болсақ, барлығымызды ұзақ уақытқа оқ­шаулайтын еді», деген Жұлдыз 3 күн оқшаулаудан кейін аман-есен туыс­тарымен қауышқанын айтып қуанды.

Осы орайда Жұлдыз өзінің аза­маттық көз­қарасын да білдіруді жөн санады. «Қазақстан Қытайдың ең жақын көр­шілерінің бірі. Сон­дықтан сақтық шаралары өте жо­ғары деңгейде болуы керек деп ой­лаймын. Солай болды да. Бізге көрсетілген медициналық қыз­мет­тердің барлығы сапалы, жоғары дең­гейде болғаны қуантты. Үкіметтің қам­қорлығында екенімізді, шынын айтсақ, жақ­сы сезіндік. Жол шығындары да Үкімет тарапынан төленді. Шетелде жүрген азаматтар осындай қиын жағдайда өз елінен қолдау тапқаны өте керемет. Сондықтан осы ретте біздің елге жетуіміз үшін барын салған құзырлы орган қызметкерлеріне рахметтен басқа айтарым жоқ», дейді ол.

 

Соңғы жаңалықтар

Ерлікті дәріптейтін қомақты қор

Руханият • 05 Маусым, 2020

Екі қылмыстық топ ұсталды

Аймақтар • 05 Маусым, 2020

Ұқсас жаңалықтар