Салтанатты жиынның алғы сөзін «Ғылым ордасы» РМК бас директорының ғылым және халықаралық байланыс жөніндегі орынбасары Н.Сейдін, Абай музейінің ғылыми хатшысы Р.Елекенова бастап, Абай музейінің қызметкері Н.Боранбаев көрмемен таныстырды. Көрмеге музей қорындағы құнды қолжазбалар мен архивтік деректер, Абайдың «Тұмар» домбырасы және 1885 жылы тарихи-өлкетану музейіне тапсырған жәдігерлерімен қатар музей баспасының басылымдары қойылды.
Көрмеде сонымен қатар Абайдың өмір сүрген кезең мен сол замандағы тарихи тұлғалар туралы деректер көрсетілген тақталар орнатылды. Шара барысында «Ғылым ордасы» РМК басшылығы Абай музейінің ұжымына алғыс білдіріп, аталған көрменің ұйымдастырушылары мен мекеме басшыларына алғыс хаттар табыс етті.
«Жиделі-Бөрібай» мемлекеттік тарихи-мәдени және әдеби-мемориалдық қорық-музейінің ғылыми хатшысы Раушан Елекенованың айтуынша, көрме жәдігерлерінің ішінде сонымен қатар 80 жылдық тарихы бар қара шаңырақтың тарихы мен абайтану ғылымының дамуы хақындағы мол мағлұматтар бар.
АЛМАТЫ
