Алматы қаласының 2015 жылға дейінгі энергетикалық кешенін дамыту және жаңғырту аясында «Алатау Жарық компаниясы» қаланың оңтүстік-батысын электр қуатымен толық қамтамасыз ететін «Мамыр» қосалқы стансасын пайдалануға берді.
Алматы қаласының 2015 жылға дейінгі энергетикалық кешенін дамыту және жаңғырту аясында «Алатау Жарық компаниясы» қаланың оңтүстік-батысын электр қуатымен толық қамтамасыз ететін «Мамыр» қосалқы стансасын пайдалануға берді.
Аталмыш станса қала тұрғындары мен оңтүстік астанадағы барлық тұтынушыларды энергиямен қамтамасыз ету мәселесінде кездесетін көптеген қиыншылықтарды азайтатын болды.
Алматы қаласының энергетикалық қуаттылығы жыл өткен сайын нығайып келе жатқаны белгілі. Қуат көзін тұтыну артқан сайын бұрынғы стансалардың жұмысына салмақ көп түсетін еді. Нәтижесінде жарық сөну, электр қуатының кернеуі төмендеп кету деген секілді келеңсіздіктер пайда бола бастаған. Соңғы жылдары қалада ашылып жатқан қосалқы стансалар мұндай кедергілерді жойып, тұтынушылардың сенімділігін арттырып келеді. Соның бірі – Әуезов ауданындағы Шаляпин көшесі мен Сайын көшелерінің қиылысында ашылған қуаты 110/10-10 кВ-тық жабық түрдегі «Мамыр» қосалқы стансасы. Алып шаһардың оңтүстік-батыс бөлігіндегі тұрғындарды, өндіріс орындарын, мемлекеттік мекемелер мен әлеуметтік нысандарды электр қуатымен сенімді қамтамасыз ететін бұл стансаның трансформаторлық қуаты 126 МВА-ны құрайды.
Жаңа стансаны салтанатты түрде іске қосқан қала әкімі Ахметжан Есімов «Алматы жарық компаниясы» қызметкерлеріне өздерінің биылғы 70 жылдық мерейтойы қарсаңында халыққа жасап отырған игі ісіне алғыс білдірді.
Қала әкімі Алматы қаласы тек республикамызда ғана емес, экономикасы жағынан өңірдегі ең қуатты қала екендігін, 2 миллионға жуық халық тұратын алып шаһардың ел экономикасындағы үлесі де өте зор екендігін айтып өтті. Қалада соңғы бес жыл ішінде 29 жаңа қосалқы станса салынып, электр қуаттылығы 779 мегавтқа артып, 3 мың мегаватқа жеткен. Осылайша, қаланы энергиямен қамту 25 пайызға ұлғайып отыр. Бұдан өзге қала аумағындағы энергия жүйелерін жаңғырту жұмыстары да тоқтаусыз жүргізіліп келеді. Мұндай ауқымды жұмыс егемен ел болғалы алғаш жүргізіліп отырғанын да айта кету керек. «Алматы жарық компаниясы» атқарған шаралар қаланы энергиямен жабдықтау ісін айтарлықтай жақсартты. Ал мына іске қосылған «Мамыр» қосалқы стансасы қала шаруашылығын энергиямен үздіксіз және сенімді қамтамасыз етуге бұрынғыдан да үлкен ықпалын тигізетін болады.
Айта кететін тағы бір жайт, электр жүйесін жақсартуға пайдаланып жатқан жабдықтардың дені өз елімізде жасалса, кейбір күрделі бөлшектер шетелдерде жасалған заманауи техника болып табылады. Жаңа стансалар қала тұрғындары мен барлық тұтынушыларды, сондай-ақ метрополитен құрылысын толық энергиямен қамтамасыз ететін болады.
«Мамыр» қосалқы стансасында әлемдік стандарттарға сай қазіргі заманғы сапасы мықты электронды жабдықтар орнатылған. Заманауи жабдықтардың арқасында шығындар азайып, электр қуатын пайдаланудағы қауіпсіздік деңгейі артып отыр. «Кентау трансформатор зауыты» АҚ кешенінде құрастырылған «SerGI» фирмасының өрттен және жарылыстан қорғау жүйесімен жабдықталған ТРМН 63000/110 трансформаторлары қазақстандық жабдықтың негізгі бөлігі ретінде қолданылып отыр. Мұнда байланыс ғимараттарында апатты жағдайлар туындағанда, оны тоқтату мен жоюға уақытты үнемдейтін, қосалқы станса жабдықтарын басқару жылдамдығын негізгі уақыт режімінде қамтамасыз ететін SCADA жүйесі бойынша орталыққа телеақпараттар беру және жинақтау жұмысын жедел жүргізетін сандық құрылғылар да қамтылған.
Жалпы, «Мамыр» қосалқы стансасын пайдалануға беру арқылы Алматы қаласын алдағы 20-25 жыл көлемінде энергия қуатымен сенімді қамтамасыз етуге жағдай жасалды. Әлі алда жыл аяғына дейін осындай 2 станса іске қосылады деп отыр қала энергетиктері.
Қанат ЕСКЕНДІР,
«Егемен Қазақстан».
АЛМАТЫ.
–––––––––––––––––––––
Суреттерді түсірген Талғатбек АСАНОВ.