Естеріңізде болса, 2014 жылы Украинаның оңтүстік-шығысындағы бірқатар аймақта сепаратистер бас көтеріп, әкімшілік ғимараттарды басып алған-тұғын. Шетелден келген қару-жарақпен олар кейінірек референдум өткізгенін желеу етіп, Луганск халықтық республикасын (ЛНР) және Донецк халықтық республикасын (ДНР) жариялады. Мемлекет ішінен мемлекет жариялағандарға Украина қарулы қарсылық көрсеткен. Алайда қайдан келгені белгісіз әскери техникамен жарақтанған сепаратистер бой бермеді. Осылайша, өңірдегі жағдай шиеленісіп, әлі күнге дейін жалғасып келеді.
Харьковта, Донецкте, Луганскідегі болған соғыс салдарынан 13 мыңға жуық адам қаза тауып, 30 мыңнан астамы жарақаттанды. Екі миллионға жуық тұрғын үйін тастап, босқын атанды.
Халықаралық қоғамдастық та, Украина да Донецк пен Луганскідегі қақтығысқа Ресейді кінәлап, өзге елдің ішкі тірлігіне араласып, қарулы көмек көрсетті деп есептейді. Алайда Кремль аталған айыптаулардың бәрінен бас тартып, сепаратистерге қолұшын созбағанын мәлімдеді.
Жоғарыдағы жағдайға қайта оралсақ. Өткен аптада болған қақтығыстан Украина шекара қызметінің бір сарбазы қаза тауып, бірнешеуі жараланды. Қарулы күштердің баспасөз қызметі Киевтің қарамағындағы аймақта орналасқан шектесу пунктіне бірнеше сепаратист шабуыл жасап, кері шегінгенін хабарлады. Сондай-ақ ауыр артиллерия қолданылғанын жеткізді.
Украина қарулы күштерінің басшысы, генерал-полковник Руслан Хомчактың айтуынша, қақтығыс кезінде 4 сепаратист оққа ұшып, 6-уы жараланғанын мәлімдеді. Қолбасшының сөзіне сүйенсек, шабуыл жасамастан бұрын артиллериялық соққы жасалған. «Қарсыластар ең әуелі камераларды жойып жіберді. Не болып жатқанын тіркеп отыру үшін барлық жаққа камера орнатылған. Олар ең әуелі соларды жойып жіберді», деді Р.Хомчак.
Алайда Луганск аймағындағы сепаратистер билігі қақтығысқа Украинаны кінәлап отыр. Олардың айтуынша, бірнеше украиналық сарбаз шектесу пунктін кесіп өтпек болған. Украина президенті Владимир Зеленский осы оқиғаға байланысты пікір білдіріп, қақтығысты бейбітшілік жөніндегі келісімге кедергі келтіру деп есептейтінін жеткізді. Әйтсе де мемлекет басшысы шабуылды кім ұйымдастырғаны жөнінде тіс жарған жоқ.
«Әскеріміздің әлеуеті мықты екенін айтқым келеді. Арандату болады. Әскеріміз лайықты жауап берді. Оқиға толықтай бақылауымызда», деді ол. Украинаның сыртқы істер министрі Вадим Пристайко БҰҰ Бас ассамблеясына Донецк және Луганск облыстарына бітімгерлер әскерін енгізудің уақыты келгенін айтып, өтініш жасады.
Шектесу пунктіндегі қақтығыстан кейін Ресей мен Украина бұқаралық ақпарат құралдары арасында ақпараттық шабуыл бұрқ ете түсті. Мәселен, ресейлік «Взгляд» газеті «Киев Мәскеуді Донбаста соғысуға шақырады» деп мақала жазса, liga.net порталы Донбастағы қақтығысқа Кремль тапсырыс бергенін жазады.
АҚШ мемлекеттік департаментінің баспасөз хатшысы Морган Ортагус туиттердегі парақшасында «АҚШ тарапы Украинаға қарсы Ресейдің кейінгі агрессиясын айыптап, әріптестері мен одақтастарын қолдайды. Біз президент Зеленскийдің бейбітшілік орнату әрекетін қолдаймыз және Минск келісіміне сәйкес оқ атуды дереу тоқтатуға шақырамыз», деп жазды.
ЕҚЫҰ-ның Украинадағы арнайы миссиясы оқиға орнына барып, жағдайды бақылап қайтты. Олардың күнделікті қорытындысына сүйенсек, аймақта 2500-ден астам бомба жарылған. Сондай-ақ қақтығыс болған жерден екі тараптан да бірнеше әскери техниканы байқаған.
