Шығыс Қазақстан облысының Қатонқарағай ауданында үздіксіз жауған жауынның соңы таудан жер жыныстарын сырғытып аңғар жиектерін басып қалуға апарып соқтырды. Осы көшкін кезінде аудандағы Листвяга жотасының жондарынан үш мың текше метрге жуық топырақ еңіске ендей жайылды.
Облыстағы бұл төтенше жағдай жергілікті маңызы бар Берел мұражайы бағытындағы Шұбарағаш ауылы тас жолының 77-ші шақырымында орын алды. Жер қыртысы көшкінінің бір бөлігі тек трассаны ғана емес, Сохатушка өзенінің аңғарын да басып қалды. Алайда, ағысы қатты тау суы біраздан кейін бұл үйіндіні өзімен бірге еңіске ағызып алып кетті.
Оқиға болған жерге шұғыл құрылған аудандық комиссия мүшелері мен авариялық жұмыстарды атқаратын бригада жеделдетіп жетті. Комиссияның баяндауынша зардап шеккендер жоқ.
Мұрат АЙТҚОЖА.