Дегенмен, Finprom.kz сайтының мәліметіне сенсек, Қазақстанда жұмыссыздық азайған. Бір жыл ішінде жұмыссыздар саны 0,1 пайызға төмендесе, 2019 жылдың төртінші тоқсанында жұмыспен қамтылған халық саны 8,8 млн адамды құрап, бір жылда 0,7 пайызға артқан. Өткен жылдың сәйкес кезеңінде көрсеткіш 8,7 млн адамды құрап, бұл жыл ішінде 2%-ға өсіпті.
Әсіресе, елордада жұмыспен қамтылған азаматтардың саны артып отыр. Жылдық өсім 9,2%-ды құрап, 553,6 мың адамға дейін көбейген. Атырау облысында жұмыспен қамтылғандар саны 4,1%-ға, Алматыда 2,9%-ға өскен. Десек те жұмыспен қамтылғандардың басым бөлігі көтерме және бөлшек сауда секторында жұмыс істейді. Яғни 1,4 млн адам көлік жөндеп, нәпақа табады. Сондай-ақ жетекші салалардың үштігіне ауыл, орман және балық шаруашылығы (1,2 млн адам немесе 13,4%) және білім беру (1,1 млн адам немесе 12,7%) салалары кіріп отыр. Жұмыспен қамтылған халықтың ең көп саны бойынша ТОП-5 саланы өнеркәсіп (1,1 млн адам) және құрылыс (642,2 мың адам) түйіндейді.
Сонымен бірге елдегі жұмыссыз халық саны 441,4 мың адамды құрап, 2018 жылдың сәйкес кезеңімен салыстырғанда 0,1%-ға қысқарған (441,9 мың адам). Алайда елімізде жұмыссыздық деңгейінің мәні өзгеріссіз қалып отыр – 4,8%. Жұмыссыздардың басым бөлігі әдеттегідей халық тығыз қоныстанған өңірлерде байқалады. Мәселен, Алматыда (жылына 49,2 мың адам), сондай-ақ, Алматы облысында (48,2 мың адам) және Түркістан (42,1 мың адам) облысында алақанын ысқылап отырғандар аз емес. Сол секілді Шығыс Қазақстан мен Қарағанды облыстарында жұмыссыздар саны тиісінше 34,5 мың және 29,7 мың адамды құрады. Жұмыссыздықтың жоғары деңгейі Түркістан облысында, Алматы мен Шымкент қалаларында байқалып отыр – 5,1%.
Жұмыс демекші, алдағы онжылдықта әлемде технология саласындағы мамандықтар үлкен сұранысқа ие болады дейді мамандар. Олар – биоинженер, биофармаколог, биоинформатика, ақылды қоршаған ортаны жобалаушы, робототехника маманы, киберқауіпсіздік бойынша маман, баламалы энергетика жөніндегі маман.
Рекрутинг порталының мәліметінше, қазірдің өзінде аталған салалардағы мамандар сұранысқа ие әрі олардың маңызы арта түсуде. Сондай-ақ нейропсихолог, бағдарлама жасаушы, дизайнер, 3D-баспа инженері, виртуалды әлемнің сәулетшілері мен дизайнерлерін де ерекше атап өткен абзал.
