Тиісті сала министрлерінің айтуынша, азық-түлік нарығындағы ахуал тұрақты, әлеуметтік маңызы бар өнімдердің жарты жылға жететін қоры бар. Өнім өндіруші кәсіпорындар үздіксіз жұмыс істеуде, алдағы уақытта олардың қуаты арта түсуге тиіс.
– Бізде дүрбелең болып жатыр деген ақпаратқа сенбеуге шақырамын. Әлеуметтік желілерде супермаркеттен түсірілген суреттің тарап жатқанын көрдіңіздер. Ешқандай жетіспеушілік жоқ екенін атап өткім келеді. Ақпараттың аздығы сезілуі мүмкін, бірақ біз тауарлардың жетіспеушілігіне жол бермейміз. Бұл бәрімізге байланысты. Дүрбелең туғызудың қажеті жоқ, – деді Б.Сұлтанов.
Министрдің айтуынша, азық-түлік бағасы бақылауға алынған. Ешқандай проблема жоқ, тапшылық болмайды. Кәсіпкерлер қолдан бағаны көтеретін болса, ол спекуляция деп бағаланады, тиісті мемлекеттік органдар оған қарсы жұмыс істеп жатыр. Б.Сұлтанов атап өткендей, аймақтардағы тұрақтандыру қорларының жұмысына қатысты жергілікті атқарушы органдардың жауапкершілігі былтырға қарағанда биыл салмақты болады.
– Жергілікті атқарушы органдар таусылуы мүмкін азық-түлік түрлері бойынша мәселені уақтылы шешуге тиіс. Бұл орайда, жергілікті атқарушы билік азық-түлік түрлеріне талдау жасауы керек. Қажеті жоғын сатып алу керек емес. Сол жағына мән бермесе, кейде өндіріс пен сұраныстың арасында алшақтық қалыптасады, – деді министр. Мәселен, былтыр қарақұмық тапшылығы туындап, кейбір өңірдің билігі нарықтағы бұл трендтер мен өзгерістерді байқамай қалған. Былтыр тоғыз айдың қорытындысы бойынша алты облыста мәселені дұрыс бақыламаған әкімдердің орынбасарлары жазаланған болатын. Биылғы жауапкершілік одан да жоғары екені түсінікті.
Ауыл шаруашылығы министрі С.Омаровтың сөзіне қарағанда, қазір республика бойынша 1,2 миллион тонна әлеуметтік маңызды тауар қоры бар.
– Мемлекет басшысының тапсырмасымен Ауыл шаруашылығы министрлігі Сауда және интеграция министрлігімен, әкімдіктермен бірлесіп жедел штаб құрды. Штабтың негізгі мақсаты – халықты негізгі азық-түлік түрлерімен қамтамасыз ету. Әкімдіктермен тұрақты байланыстамыз. Негізінен аймақтардағы тұрақтандыру қорларындағы азық-түліктің толымдылығы тексеріліп, өндірушілердің қоймаларына, сауда нүктелеріне мониторинг жүргізілуде. Қолда бар жедел мәліметке сүйенсек, қазіргі таңда республика бойынша 1,2 млн тонна әлеуметтік маңызы бар тауар бар, – деді С.Омаров.
Министр атап өткендей, бұл тауар халықты 5-6 ай көлемінде қамтамасыз етуге толығымен жеткілікті. Одан бөлек азық-түліктің барлық түрі өндіріліп те жатыр. Өңдеуге бағытталатын шикізат қоры да жеткілікті. Өңдеуші кәсіпорындар қажет болса өндірістік қуатты арттырады.
– Біздегі негізгі азық-түлік түрінің бірі – бидай ұны. Бидай ұнынан үш миллион тонна өндірдік. Бұл ішкі қажеттілікті 204 пайыздық деңгейде жабуға жеткілікті. 144 мың тонна күріш өндірілді. Күрішке ішкі сұраныс көлемі – 76 мың тонна, яғни қажеттілікті 190 пайыз жауып отырмыз. Сол секілді 165 мың тонна макарон өндірілуде, оған ішкі сұраныс – 150 мың тонна, – деді ол.
Елімізден 3,9 миллион тонна картоп өндіріліп, қажетті норма 107 пайыз артығымен орындалыпты. Сиыр, қой, жылқы, шошқа етіне деген сұранысты да отандық өндірушілер толығымен өтей алады.
– Қазақстанда ай сайын 7,7 мың тонна құс еті тұтынылады. Қорда 28,9 мың тонна құс еті бар, бұл 4-5 айға жетеді, – деді Ауыл шаруашылығы министрі.
Б.Сұлтанов пен С.Омаров елімізде азық-түліктің мол қоры бар екенін айтып, халықты дүрлікпеуге шақырды. Иә, қазір дүрлігетін емес, сабыр сақтайтын, сақтық шараларын күшейтетін уақыт.
