قازاقستان رەسپۋبليكاسى پارلامەنتى سەناتىنىڭ ءتوراعاسى-الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى قايرات ءماميدىڭ بۇۇ باس حاتشىسىنىڭ وركەنيەتتەر اليانسى جونىندەگى جوعارعى وكىلى ناسسير ابدۋلازيز ءال-ناسسەرمەن كەشەگى كەزدەسۋىندە الەمدىك جانە ءداستۇرلى دىندەر كوشباسشىلارى سەزى مەن وركەنيەتتەر اليانسى اراسىنداعى ءوزارا ءىس-قيمىل ماسەلەلەرى ءسوز بولدى، دەپ حابارلادى سەناتتىڭ باسپا ءسوز قىزمەتى.
ناسسير ابدۋلازيز ءال-ناسسەر قازاقستان باستاماشى بولىپ تابىلاتىن 2013-2022- جىلدارداعى مادەنيەتتەردى جاقىنداستىرۋدىڭ حالىقارالىق ونجىلدىعىن ۇلىقتاۋ جونىندەگى حالىقارالىق فورۋمعا قاتىسۋ ءۇشىن ءبىزدىڭ ەلىمىزگە كەلىپ وتىر. بۇۇ باس اسسامبلەياسىنىڭ 67-سەسسياسى «بەيبىتشىلىك جولىنداعى ءوزارا تۇسىنىستىك جانە ىنتىماقتاستىق، مادەنيەتارالىق جانە ءدىنارالىق ءۇنقاتىسۋدى ىلگەرىلەتۋ» قارارىن قابىلداعان بولاتىن.
اڭگىمە بارىسىندا قازاقستان نەگىزىنەن الەم مادەنيەتى جونىندەگى قارارلار اۆتورلارىنىڭ ءبىرى رەتىندە جۇيەلى تۇردە كورىنىپ كەلە جاتقانى اتالىپ ءوتىلدى. «بۇۇ جانىنداعى ادام قۇقىقتارى جونىندەگى كەڭەستىڭ مۇشەسى بولىپ قازاقستاننىڭ سايلانۋى ازاماتتار قۇقىقتارى مەن بوستاندىعىن قامتاماسىز ەتۋدەگى ءبىزدىڭ ەلىمىز تابىستارىنىڭ حالىقارالىق تۇرعىدا مويىندالۋى ەكەنىنە نىق سەنىمدىمىن»، -دەدى ق. ءمامي.
الەمدىك جانە ءداستۇرلى دىندەر كوشباسشىلارى سەزى مەن وركەنيەتتەر اليانسى اراسىنداعى ىنتىماقتاستىقتىڭ كەلەشەگىن تالقىلاي كەلىپ، اڭگىمەلەسۋشىلەر جالپىعا بىردەي بەيبىتشىلىك پەن قاۋىپسىزدىككە قول جەتكىزۋ ىسىندە ءدىنارالىق جانە مادەنيەتارالىق توزىمدىلىك پەن كەلىسىم ءرولىن ارتتىرۋعا باعىتتالعان بىرلەسكەن جۇمىستاردى دامىتۋ قاجەتتىگىن اتاپ ءوتتى.
«قازاقستان پرەزيدەنتى نۇرسۇلتان نازاربايەۆ 2012- جىلعى قازان ايىنداعى اۆسترياعا رەسمي ساپارى بارىسىندا ەكى فورۋمنىڭ كۇش-جىگەرىن بىرىكتىرۋدى ۇسىنعان بولاتىن. ءبىز ءدىنارالىق جانە كونفەسسياارالىق ءۇنقاتىسۋ مەن كەلىسىمدى نىعايتۋ سالاسىندا جيناقتالعان مول تاجىريبەمىزدى وركەنيەتتەر اليانسىمەن بولىسۋگە ءازىرمىز»، -دەپ اتاپ ءوتتى سەنات ءتوراعاسى.
