Шығармашылық ұжым #BizBirgemiz республикалық акциясын қолдап, қазақстандықтардың амандығына жасалып жатқан, қауіпті індетке қарсы қолға алынған шараларға барынша үлес қосуда. Іспен үлгі болып, өнермен халықтың рухына дем беріп келеді. Соның айқын көрінісі – филармония әртістері әртүрлі орында, әртүрлі уақытта орындаған «Атамекен» әні. Бір қызығы, орындаушылар музыкалық шығарманы бірінен соң бірі жалғастырып шырқайды.
Қазақтың жүрегіне айналған ән әрбір адамның бойында Отанға деген сүйіспеншілікті арттырып, жігерлендіреді. Халық әртісі Ескендір Хасанғалиевтің әні – бар қазақтың аузында жүрген туынды. Қазіргідей сын сағатта бәріміз бірігіп, бір жеңнен қол, бір жағадан бас шығаруымыз қажет. Ұлтымызды шабыттандыратын осындай әнмен рухымыз берік болса игі. Талай қиыншылықты бастан өткерген Қазақстан бұл ауыр сынаққа да төтеп береді.
