Жиын барысында белгілі болғандай макроэкономикалық көрсеткіштердің өзгеруіне байланысты 315,6 млрд теңге кешенді іс-шараларға бағытталып отыр. Осы қаражат есебінен ағымдағы жылдың 1 сәуірінен бастап әлеуметтік төлемдерді индекстеу және шетел валютасы бағамының өзгеруіне байланысты шығыстарды жабу жүзеге асырылмақ. Бұған қоса, Мемлекет басшысының жекелеген тапсырмаларын іске асыруға 293,3 млрд теңге бағыттау ұсынылып отыр. Бірінші қаржы вице-министрінің айтуынша, коронавирустық инфекцияның пайда болуы мен таралуына жол бермеу жөніндегі іс-шараларды қаржыландыруға, сондай-ақ әлеуметтік маңызы бар азық-түліктерді сатып алуға Үкімет резеврінен бүгінгі күнге дейін 39,1 млрд теңге бөлінген.
̶ Коронавирустық инфекцияға қарсы күрес бойынша жүргізілетін эпидемияға қарсы шараларға жалпы сомасы 23,4 млрд теңге бөлінді. Сондай-ақ, жеке қорғану құралдарын, дезинфекциялау құралдарын, дәрілік заттар мен медициналық бұйымдарды сатып алуға – 20,6 млрд теңге, коронавирусты анықтау үшін тепловизорларды, зертханалық жабдықтарды және тест-жүйелерді сатып алуға – 2,7 млрд теңге, Қазақстан азаматтарын Қытайдан көшіруге 131 млн теңге бөлінді, – деді Б.Шолпанқұлов. Сонымен қатар, аталған қаражат аясында өңірлерге жеке қорғану құралдарын, дезинфекциялау, дәрі-дәрмек және медициналық бұйымдарды сатып алуға 11,6 млрд теңге аударылды. Оның ішінде Нұр – Сұлтан мен Алматы қаласына ̶ 1,4 млрд теңгеден, Шымкент қаласына ̶ 605 млн теңге бағытталған.
Қаржы министрлігінің бірінші вице-министрінің айтуынша, Мемлекет басшысының тапсырмасы сәйкес 2020 жылға арналған бюджетті нақтылау шеңберінде эпидемияға қарсы шараларға қосымша 125 283,5 млн теңге қарастырылады. Оның ішінде карантин кезінде денсаулық сақтау жүйесінің қызметкерлерін ынталандыруға ̶ 40 609,8 млн теңге, коронавирустық инфекциямен ауыратын адамдарды және күдікті емдеуге жатқызылған адамдарды емдеу үшін, сондай-ақ COVID-19 жаңа коронавирустық инфекциямен ауыратын науқастармен қарым-қатынасқа күдікті оқшаулау мақсатында медициналық ұйымдарға медициналық қызметтер үшін 19 509,6 млн теңге қарастырылмақ. Сонымен қатар, Нұр-Сұлтан, Шымкент және Алматы қалаларында 3 медициналық модульдік кешен құрылысына 14 800 млн теңге бөлінбек.
Мемлекеттің экономиканы қолдауға бағытталған кешенді шаралары кезінде шағын және орта кәсіпкерлікті салықтан босату туралы шешім қабылдады. Бұл ең алдымен мемлекет қазынасына салық есебінен түсетін табыстың кемуіне әкеледі. Бұдан бөлек қазіргі мұнай бағасының күрт төмендеуі де экономикасы шикізатқа тәуелді біздің ел үшін оңай болмайтын деп тұр. Б.Шолпанқұлов баяндамасында бюджетке түсетін кірістер жайында ақпарт берілді. Шағын және орта кәсіпкерлерді салықтан босатқан 3 ай ішінде республикалық және жергілікті бюджетке шамамен 1,2 млрд теңге түспейтіні анықталып отыр. Бұған қоса, Қаржы бірінші вице-министрі Б. Шолпанқұловтың бұған дейін мұнай мен мұнай өнімдерінің экспортына тікелей байланысты экспорттық кедендік баж 700 млрд теңгеге дейін төмендетілгенін, енді бұл сома 300 млрд теңгеге дейін төмендегенін айтты. Болжам бойынша, мұнай бағасы 20 доллардан асатын болса, экспорттық кедендік баж салығы бойынша бюджетке ешқандай түсім түспейді.
