Руханият • 03 Сәуір, 2020

«Егеменнен» – ертегі» жобасын ұсынамыз!

68 реткөрсетілді

Кеш қарая үйдегі кішкентайлар радионы бірінші болып қосуға асыға жүгіретінбіз. Өйткені күнде кешке оқылатын ертегіні тыңдамай қалу дегеніңіз үлкен өкінішпен пара-пар еді. Әншейінде басымыз сыйыс­пайтын біздер сол кеште тату-тәтті отыра қалып, ың-шыңсыз ертегіге құлақ түретінбіз. Қаһарманның ерлігі кеудемізде үміт отын тұтатып, өзімізге беймәлім алыстағы арманға ұмсынып, тәтті қиялға бой алдыратынбыз.

Ықылым заманнан күні бүгінге дейін жалғасып келген қазақ халық ертегілерінің дәл қазір қажеттілігі тіпті кү­­шейіп, мән-мағынасы артып отырғандай. Олай дейтін себебіміз, алапат дерттен аман қалу үшін жан ұшырған адамзат баласы әліптің артын бағып, бір-бірінен алыстап, оқшау отыр. Дәл осындай сын сағатта газетіміз талғампаз кіш­кен­тай тыңдармандар үшін «Еге­меннен – ертегі» жобасын көпшілік назарына ұсынып отыр. Мұндағы мақсат – үйде отырған жас өскіннің көңілін аулау, қуа­ныш сыйлау. Ер­тегіні «Egemen Qazaqstan» газетінің YouTube арнасынан күн сайын тыңдай аласыздар. Нұр-Сұлтан қаласы әкімдігінің «Қуыршақ» театрының әртісі, Мәдениет саласының үздігі Салтанат Мағзым ертегілерді түрлендіре оқып шықса, жобаны атқаруға суретші-кари­катурашы Айдарбек Ғазиз, газет тілшілері Ая Өмір­тай, Жанболат Кенжеғұл атсалыс­ты.

«Ертегі баланы мейірімге үндейді. Тапқырлыққа үйре­теді. Еліміздің бас газеті «Ege­men Qazaqstan» мен «Қуыр­шақ» театрының бірлес­кен жобасы ұрпақ үшін басты байлық. Дәл қазіргі қиын сәтті бірлесе жеңіп шығатынымыз сөзсіз. Мұндай жобаларды қолдауымыз керек, аз да болса үлесімді қосып отырғаныма қуаныштымын», дейді Нұр-Сұлтан қаласы әкімдігі «Қу­ыр­шақ» театрының әртісі Салтанат Мағзым.

Көркемдік эстетикалық қуатымен бірге тәрбиелік мәні зор болып келетін қазақ халық ертегілері әдебиетіміздің асыл қазынасы. Тұрмыс-сал­ты­мыздағы өмір шындығы ертекші баяндаған әңгімеде жаңа бір тұрпатқа ие болып, ғажайып көрініске айналып, көркемделе түседі. Қазақ ра­дио­сындағы «Ерден атаның ертегілері», «Зәмзәгүл әженің ертегілері», «Кешкі ертегілер» деген атпен үзіліссіз беріліп тұратын ізгілікті дәстүрдің жалғасындай болған шағын жобамызды кішкентай тың­дармандар қуана қабыл алады деген үміттеміз!

Соңғы жаңалықтар

Елдік нышандар тарихы

Қазақстан • Бүгін, 18:14

Атырау: Үй қамаққа қамалған қыз

Аймақтар • Бүгін, 18:00

Биыл ауылға табиғи газ жетеді

Аймақтар • Бүгін, 14:29

Ұқсас жаңалықтар