Елбасы • 04 Сәуір, 2020

Елбасының денсаулығы жақсы, жұмысын жалғастырып жатыр - Айдос Үкібай

119 реткөрсетілді

Елбасының баспасөз хатшысы Айдос Үкібай ел ішінде Нұрсұлтан Назарбаевтың денсаулық жағдайына қатысты тараған қауесетті жоққа шығарды. Бұл туралы ҚазАқпарат хабарлады.

«Кеше Қауіпсіздік Кеңесінің төрағасы Нұрсұлтан Назарбаев бірқатар өңір әкімдерімен телефон арқылы сөйлесті. Осы орайда, бірінші кезекте, төтенше жағдай кезінде халықтың қауіпсіздігін қамтамасыз етудің өзекті мәселелерінің талқылануы қалыпты жағдай. Қатаң карантиндік талаптар аясында Елбасының жұмыс кабинетіне кіру тұрғысында да шектеу бар екенін түсіну керек. Алайда шектеуге қарамастан, баспасөз қызметі Тұңғыш Президенттің қызметі туралы халықты дер кезінде ақпараттандыруға тырысуда» деді Айдос Үкібай.

Осы орайда ол баспасөз қызметі бұған дейін тараған ақпараттарға шолу жасап, оларға қатысты пікір білдірмегенін атап өтті.

«Дегенмен соңғы кездері жекелеген адамдар елдегі жағдайды тұрақсыздандыру бойынша белсенді әрекеттер жасауда. Оның ішінде Елбасының денсаулығына қатысты шындыққа жанаспайтын қауесет таратуға тырысуда. Осының барлығы - арандату мен жалған ақпарат» деп атап өтті баспасөз хатшысы.

Сондай-ақ Айдос Үкібай Тұңғыш Президенттің денсаулық жағдайы жақсы екенін, сонымен қатар, Елбасы Отан игілігі үшін карантин кезінде де жұмысын жалғастырып жатқанын айтты.

«Егер де біреудің күмәні болса, кеше Елбасы сөйлескен әкімдердің кез келгенінен сұрасын. Енгізілген шектеулердің барлығы тоқтаған кезде, Тұңғыш Президенттің қатысуымен өткен жұмыс кездесулері немесе кеңестерден видеожазбаны жеке өзім жасауға уәде етемін» деді Айдос Үкібай.

Еске сала кетсек, кеше Елбасы өңір әкімдерімен халықтың қауіпсіздігін қамтамасыз ету дайындығын талқылаған болатын.

 

Соңғы жаңалықтар

Елдік нышандар тарихы

Қазақстан • Кеше

Ұқсас жаңалықтар