Екі ірі мегаполисте жұмыссыз режим енгізілгені бекерден бекер емес. Бұл коронавирус инфекциясының таралуын шектеу мақсатында қолға алынып отыр.
Карантинді күшейткен уақыт аралығында белгілі бір мекемелер ғана жұмыс істейді. Атап айтқанда, жарық, су, кәріз, қоқыс тазалау сынды қала тіршілігін қамтамасыз ететін жүйелер, сонымен қатар, көше, аула, тұрғын үй-жайларының тазалығына жауапты мамандар, жеделсаты қызметі, жол қозғалысын ұйымдастырушылар, пошта, курьерлер мен апаттық қызметтер бар. Мұның сыртында дәріхана, аурухана, емханалар мен зертханалар, азық-түлік дүкендері де жұмысын жалғастыра береді.
Құрылыс - қаланың қалыпты өмірін қамтамасыз ететін сала емес. Сондықтан карантин режиміне олар да бағынып, жұмысын тоқтатуға тиіс. Нұрсұлтан қаласы Қалалық орта сапасы және бақылау басқармасы өкілдерінің бізге берген мәліметі бойынша, егер құрылыс аумағында жатақханалар болып, жұмысшылар сыртқа шықпай жұмыс істейтіндей мүмкіндік болса, онда жұмысты жүргізе беруге болады. Бірақ ол үшін басшылық санитарлық талаптарды қатаң ұстап, деинфекция жұмыстарын жүргізіп, мамандарын маскамен, антисептикпен, бір реттік қолғаппен қамтамасыз етуі керек. Ал осы талаптарға сай емес құрылыс компаниялары жұмыс істемеуге тиіс, дейді мамандар.
Қымбат ТОҚТАМҰРАТ
