Конституция мерекесі қарсаңында Көкшетау қаласында
«Қолжетімді баспана-2020» бағдарламасы шеңберіндегі тұрғын үй құрылыс жинақ салымдары» жүйесімен 90 пәтерлі үш үй пайдалануға берілді.
Конституция мерекесі қарсаңында Көкшетау қаласында
«Қолжетімді баспана-2020» бағдарламасы шеңберіндегі тұрғын үй құрылыс жинақ салымдары» жүйесімен 90 пәтерлі үш үй пайдалануға берілді.
Қуаныш иелеріне кілт тапсыру салтанатында қала әкімінің орынбасары Алтынай Әміренова Елбасымыз тұрғын үй құрылысын мемлекеттік саясаттың басым бағыттарының бірі ретінде белгілегенін атап көрсетті. Бұл орайда Көкшетау маңызды міндеттің үдесінен шыға білуде. Былтыр Тұрғын үй құрылыс жинақ банкінің салымшылары алғашқы үш үйге қоныстанған болатын. Ал, үстіміздегі жылдың соңына дейін жалпы аумағы 80 мың шаршы метрлік 11 үй қаламызға көрік қосатын болады.
Мемлекеттік бағдарламаны жүзеге асырудың басы-қасында жүрген «Тұрғын үй құрылыс жинақ банкі» АҚ Ақмола облыстық филиалының директоры Айбас Жарқымбаевтың сөзі көпшілікке ой салғандай еді.
– Еліміз өз тұрғындарына мерекелік тартулар жасауды игі дәстүрге айналдырды, – деді ол. – Бүгінгі қуанышты шара соның бір көрінісі. Жалпы, тұрғындар «Қолжетімді баспана-2020» бағдарламасының түпкі мақсатын түсіне бастады, оған өздері де белсене қатысып отыр. Мәселен, «Центральный» шағын ауданындағы 60 пәтерлі екі үйге өтініш берген салымшыларымыздың саны 208-ге жетті. Сұраныстың артуына байланысты, келесі жылы «Сарыарқа» жаңа шағын ауданы мен «Жансая» тұрғын үй кешенінде 300 пәтерлі 10 үйдің құрылысын жүргізуді жоспарлап отырмыз. Демек, банк клиенттері қаржы айналымы тәртібі мен оны тиімді пайдалану, шығындарды жоспарлау үрдісіне мүдделілік танытуда деп айта аламын.
Бақберген АМАЛБЕК,
«Егемен Қазақстан».
Ақмола облысы.
