Коронавирус пандемиясының салдарынан әлем өзгеріп, адамзаттық құндылықтарға қатысты ойы өзгерді. Достық, бірлік пен жанашырлық сияқты қасиеттер адами қатынастың басты кілтіне айналды. Әлбетте, достық пен бірлік – бұған дейін де дәріптеліп келген асыл қасиеттер. Бұл ретте Елбасының хакім Абайдың өсиетін айтып өткені тебірентті. Осы орайда Әлішер Науаидің де достық туралы өлеңдері есіме түсті.
Елбасы өз мақаласында адами қасиеттер тәрбиелеудің маңызы туралы тағы бір рет сөз қозғады. Оған қоса жастарға үндеуі оның жас ұрпақтың тағдырына ерекше алаңдайтынын көрсетті. Бүгінгі жағдайлар мен заман талабына жастардың бейімделуі қиынға соғатынын түсініп, Елбасы «Біріңді, қазақ, бірің дос, көрмесең – істің бәрі бос» деген Абай атамыздың өсиетін ешқашан естен шығармауға шақырды.
Дана халқына алғыс білдіре келе, әрбір қазақстандықтың жүрегін тебірентіп, Қазақстан халқын қалай қадірлейтінін айтты. «Қазақстан Республикасының ең қымбат қазынасы – адам және оның өмірі. Сондықтан әрқайсымыз өзіміздің, жақындарымыздың өмірі мен денсаулығына үлкен жауапкершілікпен қарауымыз керек», деді.
Осы айтылғандарды қорыта келе, мен Елбасының ойымен толықтай келісетінімді жеткізгім келеді. Біз – бір елміз, ал халқымыздың бірлігі мен ынтымағы жарасқан. Ендігі кезекте кездесіп отырған қиындықты бірлесіп, асқан жауапкершілік танытып жеңуіміз керек. Бірлігіміз бен біртұтастығымызға нұқсан келтірмеуіміз керек. Мәңгілік ел мақсатына ұмтылуымыз қажет.
Шерзод ПУЛАТОВ,
Қазақстан халқы Ассамблеясы Төрағасының орынбасары