Ол – Кеңес Одағының Батыры, тұңғыш Халық Қаһарманы, еліміздің тұңғыш Қорғаныс министрі, Армия генералы Сағадат Қожахметұлы Нұрмағамбетов. Бұл ой бұдан бір жылдай бұрын келді. Үлкен тас жолдың бойына билборд қою керек. Ауылды батырдың атына сай болатындай жағдайға келтіру қажет. Бұл үшін мәдениет үйін күрделі жөндеуден өткізіп, алдына ескерткішін қойып, музей ашу керек. Орта мектепке қаһарманның есімін берген дұрыс болар еді. Бірақ осы мекеме де күрделі жөндеуді қажет етіп тұр. Оған қомақты қаржы қажет. «Іздегенге – сұраған» дегендей Қазақстанда С.Қ.Нұрмағамбетов атындағы халықаралық қор бар екенін білдім. Қордың президенті Махмут Нілібаев мырзаға жолықтым. Ол кісі қолдайтынын және мүмкіндігінше көмектесетінін айтты. Бұл қордың өкілі Қали Қамбаров екеуміз сол елге барып, ауыл әкімі Сағындық Абаханов үшеуміз ауылды көркейту туралы жоспар жасап, аудан әкімінің келісімін алып, облыс әкіміне шықтық. Облыс әкімі мәдениет үйі мен мектепті күрделі жөндеуге қаржы бөліп, бұл істі қандай құрылыс ұйымы орындайтыны анықталуда екен. Таяуда Ақкөл ауданының әкімдігінде билборд орнату, музей ашу, мектепке батырдың есімін беру, бюст жасау т.б. мәселелер қаралып, әрбір салаға тапсырма берілді. Ұлы Жеңістің 75 жылдығына және «Рухани жаңғыру» бағдарламасына сәйкес ақкөлдіктер, оның ішінде Еңбек ауылы 2020 жылды С.Қ.Нұрмағамбетов жылы деп атап отыр. Бұл ердің аруағына елінің көрсеткен құрметі және онымен қоса өскелең ұрпаққа патриоттық тәрбие беруге қосылған зор үлес дер едік.
Еркін ДӘУЕШОВ,
Ақкөл ауданының құрметті азаматы
Ақмола облысы
