Осыған сәйкес, облыстық маңызы бар 440 шақырым жолды жөндеу және қайта жаңарту жоспарланған. 6 аудан орталығындағы жолдар жөнделеді. Сонымен қатар облыстың барлық өңірінде кентішілік жолдарды жаңарту көзделген. Аймақта жергілікті маңызы бар автомобиль жолдарының ұзындығы 5626 шақырымды құрайды. Оның 2661 шақырымы облыстық, 3 мыңға жуық шақырымы аудандық маңыздағы жолдар.
– Жол қозғалысының қауіпсіздігін қамтамасыз ету мақсатында жыл сайын бюджет есебінен жол жөндеу жұмыстарына қомақты қаражат қарастырылады. Оның ішінде жол салу, қайта жаңарту және күрделі, сондай-ақ ағымдағы жөндеу жұмыстары жоспарланған. Биыл жергілікті маңызы бар автомобиль жолдарын жөндеуден өткізуге 24 миллиард теңге бағытталып отыр, – дейді облыстық жолаушылар көлiгi және автомобиль жолдары басқармасы жетекшісінің орынбасары Владимир Кулаков.
Облыс орталығында қала ішілік жолдарға жөндеу жұмыстары қарқынды жүргізілуде.
– Дәл қазір Пушкин көшесінде асфальт-бетон төсеп жатыр. Техника мен жұмыс күші жеткілікті, – дейді учаске шебері Екпін Молдахмет.
Үстіміздегі жылы Балкашино - Шантөбе бағыты мен Жаңа Колутон - Азат - Минск жолдарына күрделі жөндеу жұмыстары жүргізілмек. Сондай-ақ Ақкөл-Журавлевка, Қонысбай - Сейфуллин - Қызылсая елді мекендерінің арасындағы жолдар жаңартылады.
Ақмола облысы
