Үстіміздегі жылдың басында Германияда Аян жайында фильм шықты. Немістердің ARD арнасынан көрсетілген сол фильмде айтулы азаматтың жемқорлыққа тікелей қатысы бар екені айтылды. Сондай-ақ спорттың бұл түрінде допингке қарсы күрес өз деңгейінде жүргізілмей, Аян мырза көптеген деректерді жасырып қалғаны жайында да баяндалды.
Фильм жарық көргеннен соң дау-дамай басталды. Тергеу амалдары аяқталғанша федерация президенті 90 күнге жұмыстан шеттетілді. Ал күні кеше Аянның қызметтен кеткені белгілі болды.
81 жастағы Томаш Аян 1975-2000 жылдар аралығында Халықаралық ауыр атлетика федерациясының бас хатшысы болды. Содан кейін 20 жылға жуық уақыт осы ұйымды басқарды. Аян мырза Қазақстанға да бірнеше рет келіп, Нұр-Сұлтан мен Алматы қалаларында өткен әлем және құрлық чемпионаттарының тұсауын кесті.
