Ал бүгінгінің батырлары атанған дәрігерлер мен медбикелер қауіпті дерттің бел ортасында жүр. Осы кезеңде мені еліміздің іскер азаматтары деп бағалайтын дәулеттілердің үнсіз отырғаны ойландырады. Оларды миллиардер атандырып, байлыққа кенелткен осы елдің қазынасы, барша халықтың несібесінің бір бөлігі емес пе? Ендеше, бүгінгідей қауіпті індетпен ел болып күресіп жатқанда олардың да елдегі ірілі-ұсақты кәсіп иелеріне үлгі-өнеге көрсететін сәті келген жоқ па? Бұл ретте жазушы Ғабит Мүсірепов айтқандай, «Бізге қарны тойса, қалғып кетпейтін ұрпақ қажет» екенін баса айтқым келеді. Басқа мемлекеттердің бәрінде дәулетті адамдар өз елі арқылы халқына қомақты көмек көрсетуде. Біздің елде де осындай ірі қолдаулар қолға алынса құба-құп. Осы орайда Тұңғыш Президент – Елбасы Нұрсұлтан Назарбаев «Egemen Qazaqstan» газетінде жариялаған «Бірлесе білген ел бәрін жеңеді» атты мақаласында «Кәсіпкерлерге де арнайы айтарым бар: сіздер тәуелсіздіктің арқасында өз істеріңізді қалыптастырып, аяқтарыңызға нық тұрдыңыздар, мол дәулетке кенелдіңіздер. Енді «Мен еліме не беремін?» дейтін кездеріңіз келді» деді емес пе?!
Ендеше, бүгінде дәулеттілер жүрегінің елім деп соғар сәтін дәл қазіргі уақытта көрсетуі тиіс. Себебі бүгінде халыққа «Forbes» журналының тізіміне енгендерге қарағанда, ауруханадағы ақ желеңді абзал жандар мәртебесінің әлдеқайда жоғары екенін көрсетуде. Расымен де, қауіпті індетпен күні-түні күресіп, науқастардың сауығып шығуы үшін өз отбасына жете алмай жатқан дәрігерлер қаншама? Олар халықтың саулығы үшін тәуекелге бел байлап, бұған дейін атқарып келген қарбалас тірлігі тіптен күшейді. Яғни, инфекциямен күрестің негізгі салмағы ақ халаттыларға түсуде. «Соңғы науқас жазылып шыққанша үйге қайтпаймыз!» деген олар Гиппократ антына адалдық танытып, аяғынан тік тұрып қызмет етуде. Өйткені науқастардың сауығуында бар үміт – дәрігерлерде. Олай болса, осынау сәтте медицинадағы дәрігерлер мен басқа да қызметкерлерге барша халық демеу болуы қажет-ақ. Демек, әрбір тұрғын өз саулығына бейжай қарамай, елде қолға алынған темірдей тәртіпті сақтауы қажет. Ал мемлекет халықтың әлеуметтік жағдайына назар аударып, азық-түлікпен, дәрі-дәрмекпен қамту ісіне басымдық беруде.
Кәсіпкерлер мен қоғамдық ұйымдар, жекелеген қарапайым азаматтар да қолдан келгенше көпке, бір-біріне демеу болып жатқанын күнделікті бұқаралық ақпарат құралдарынан көріп, біліп жатырмыз. Бұл игі істің ортасынан жастардың да табылып, ерікті түрде белсенділік танытқанына сүйсінеміз. Осы орайда ірі-ірі кәсіпкер азаматтарымыз қайда деген ойда қалып жүргеніміз рас. Неге олар осынау шақта елімен бірге болмайды? Неге халықтың ортасынан табылып, ел Үкіметі арқылы қазақстандықтарға қолдау көрсетпейді? Міне, маған осындай сан сауал маза бермей қойды.
Өйткені бүгінгідей әлемді жайлаған індеттің алдын алу және онымен күрес кезеңінде барлығын бірдей мемлекетіміз шешеді деп алаңсыз отыруға болмайды. Осы орайда өзім басқарып отырған бизнес құрылымдарының жетекшілерімен кеңесіп, дерттің алдын алуға біз де жұмылдық. Көмек есебінде 1 млн теңге көлемінде қаржы бөлдік. Бұл сан ғасырлық тарихы бар, рухы мықты Қазақ елі өзінің жігерлі азаматтарымен талай қиындықты басынан өткергенде береке-бірлігіміздің арқасында кедергілерді жеңіп шыққанын ұмытпағаннан қолға алынған игі іс еді. Атыраулық фермерлер бірлескен істе белсенді болуға әлі де атсалыса береді. Айтпағым, халқымызға сын сағатта қолдау болуда мүмкіндігі мол қалталы азаматтардың қатары әлі де артса екен деймін.
Мұрат САРМАНОВ,
«Қазақстан фермерлер одағы» қоғамдық бірлестігі Атырау облыстық филиалының төрағасы
