Облыс әкімі Өмірзақ Шөкеевтің қаулысына сәйкес, өңірде еліміздің Қарулы Күштерінің аумақтық әскерін жасақтауға 230 азамат шақырылған. Оның ішінде облыс орталығы Түркістан қаласындағы 50 сарбаздан тұратын әскерилер жасағын қала әкімі Рашид Аюпов басқарады. Облыста барлық әскери құрылым төтенше жағдаймен күресуге жұмылдырылған. Десек те қауіпті кезеңде әлі де қосымша күш керек. Негізгі мақсаты халықтың қауіпсіздігі мен денсаулығын қорғау және қамтамасыз ету болып табылатын әскери жасақ қатарына ең үздіктер таңдалған. Облыс әкімі Өмірзақ Шөкеев сын сағатта арнайы жиынға шақырылған азаматтарға сәттілік тіледі. Осылайша көшелерде жаяу бақылау жүргізуге және облыс аумағында қойылған блок-бекеттерде қызмет атқарып, зарарсыздандыру жұмыстарына қатысатын арнайы жасақталған сарбаздар іске кірісті. Жиынға шақырылғандардың жұмыс орындары сақталады. Жалақылары бойынша да олар ұтылмайды. Басқа өңірге емес, әркім өздерінің тұрғылықты аумақтарында жұмыс істеп, жалақы алады. Күнделікті жұмысқа барып, кешкісін отбасына оралады. Яғни, әскери жиынға шақырылатындарға жағдай жасалған.
Түркістан облысы