Аймақтар • 25 Сәуір, 2020

Көкшетаудағы қайырымдылық шарапаты

10 реткөрсетілді

Елімізде жарияланған төтенше жағдай кезінде қазақстандықтар бірлік пен ынтымақтың үлгісін көрсетіп жатыр. Мұқтаж жандарға қол ұшын созып, қиындықты жеңуде қамқорлық танытып жатыр. «Біз біргеміз!» республикалық акциясы басталғалы оған қатысушылардың қатары артып келеді.

Осы жолы тәжік-ауған шекарасындағы әскери іс-қимылдарға қатысушылар облыс орталығындағы аз қамтылған және көпбалалы отбасыларына көмек көрсетті. Жаны жомарт, жүрегіне мейірім ұялаған жерлестеріміз бүгінгідей қиын кезеңде халықтың әлеуметтік тұрғыдан осал тобына қажетті деген азық-түлік өнімдерін сатып алып, үйді-үйге таратуды қолға алды. Акция аясында  35 отбасына көмек көрсетілмек. 

– Шамамыз келгенше қолдау көрсетеміз.  Бүгін 25 отбасына қажетті өнімдерді жеткіземіз деп отырмыз. Ал, ертең тағы  10 отбасын қамтимыз,–дейді «Тәжік-ауған әскери іс-қимылдарына қатысушылар» республикалық қоғамдық бірлестігі филиалының төрағасы Қайдар Бәкіров.

Аталған акция ел бірлігін бекемдей түсуге зор ықпал етуде.  Ең қажетті деген азық-түлік қоры мен балалар үшін алынған тәтті-дәмділер, әсіресе көпбалалы отбасылардың қиындықты еңсеруіне зор демеу. Қайырымдылық шарасының шарапаты алтын құрсақты ана, алты баланы бір өзі тәрбиелеп отырған Асера Әлімқанованың отбасына  да тиді.

Коронавирус індетін бірігіп қимылдасақ қана жеңеміз. Аталған акция соның бірден-бір куәсі. Тек карантин режимін қатаң сақтау қажет.

 

Көкшетау қаласы

Соңғы жаңалықтар

Ғасыр зұлматы

Қоғам • Кеше

Ұқсас жаңалықтар