Қоғам • 28 Сәуір, 2020

Өнерлі өрендерді жиған «EL Jastar»

21 рет көрсетілді

Былтыр Көкшетауда талантты өрендерден құрылған «EL Jastar» театры ашылған болатын. Жаңадан құрылған шығармашылық ұжымы аз уақыт ішінде көпшілікке танылып үлгерді.

Суретте: EL Jastar театры­ның ұжымы

Театр труппасы ашылғанына көп өтпей жатып Ақтөбе қала­сының 80-жылдығына арналған «Балауса» халықаралық фести­валінде бақ сынады. Бәйге­ге қа­тысып қана қоймай, қала әкі­мінің сыйлығы мен фести­валь­дің арнайы номинациясын жеңіп әкелді. Шығармашылық үнемі жетіліп отыруды талап ететінін жақсы білетін өнерпаздар фес­тивальдегі жетістікке мар­қа­йып қалмай, басқа да сүбелі дү­­­ние­лерді сахналауды қолға алды. Осы орайда бүгінгі күннің ма­ңызды мәселесі – балалардың электронды гаджетке шектен тыс тәуелділікке ұшырауын проблема етіп көтерген «Асқар мен асық» атты ертегіні көрермен назарына ұсынды.

Театр труппасының негізгі құрамы Ақан сері атындағы Жо­ғары мәдениет колледжінің сту­денттерінен жасақталған. Ұжым­дағы колледж студенттері оқу бітірген соң ірі қалалардағы білім ордаларына оқуға түсті. Біразы әр өңірдегі театрларға жұ­мысқа орналасты. «EL Jastar» театрының жастары өз жолдарын тауып, өнер жолындағы биік мақсат, асқақ арманға қол соз­ғаны қуантады.

Театрдың арт-директоры Хәкім Хасанбай мен көркемдік жетекшісі Фархадбек Канафин намысқа тырысып, биылғы оқу жылы басталысымен тағы да сол колледж студенттерінен ірік­теп, жаңа труппа құрды. Ағым­дағы жыл «Абай жылы» деп белгіленуіне байланысты хакім шығармашылығын насихаттау мақсатында перформанс жанрын­дағы «Жастықтың оты, қайда­сың?!» атты спектакль дайын­дады. Көкшетаудағы «Абай жы­лы» ақпан айының ба­сында осы қойылыммен ашыл­ғанын атап өткен ләзім.

Бұл қойылымға үш ай уақытын сарп еткен екі маманның еңбегі зор. Осындай кезде Жоғары мә­дениет колледжінің директоры Құралай Ғазизқызы қолұшын беріп, қолдау танытқан. Өнерді терең түсінетін ол колледж қа­быр­ғасында оқитын талантты жастардың ұйымдасып, үлкен іске білек сыбана кіріскенін көр­ген соң, олардың алаңсыз дайындалуына жағдай жаса­ды. Сахна, кос­тюм сынды театр­дың бұлжымас бөлшектері, ба­летмейс­тер, дыбыс, жарық опе­раторы сынды сан қыр­лы мамандар да колледж студент­терінің арасынан табыла кетті. Премьераға келген ел ағалары жас­тардың өнерге деген махаббатын көріп, алғысын айтып, батасын берді. Еңбектің жан­ғаны деген осы емес пе! Ал Көк­шетаудағы Жанайдар Му­син атындағы жоғары қазақ пе­дагогикалық колледжінің д­и­рек­­­­торы Нұртас Ахатұлы 250 мың теңге көлемінде, Құра­лай Ыды­­рысова 180 мың теңге кө­­ле­мінде сертификат табыс­та­ған. Бұл жа­на­шырлықтан туған қолдау.

«EL Jastar» театры ұлы Абай­ға арналған осы қойылыммен облыстағы аудандар мен қала­ларды аралап шығуды жоспарлап отыр. Сондай-ақ республиканың өзге өңірлерінде өтетін театр фес­тивальдеріне қатыспақ. Биылғы жылдан күтері көп талантты жас­тардың өнері өрістеп, жігері жа­лындай түссін дейміз.

 

 

 

 

Соңғы жаңалықтар

Новак Джокович Қазақстанға келеді

Теннис • 23 Қыркүйек, 2022

Атырауда қонақүйден өрт шықты

Оқиға • 23 Қыркүйек, 2022

Ұқсас жаңалықтар