Бұл қаражаттың белгілі дәрежеде ұлғайғанын көріп отырмыз. Өткен жолы дағдарысқа қарсы қолдау шараларына арналған пакет көлемі 4,4 трлн теңге болған еді. Демек, белгілі бір дәрежеде бұл қаражат алдағы уақытта да өсе беретінін көріп отырмыз. Бұған қоса бүгінде 4 млн 250 мың азаматқа қаржылай көмек көрсетілді. Көмектің бұл түрі де алдағы уақытта арта береді деген сенімдеміз.
Жалпы, елдегі табысынан уақытша айырылған азаматтарды қолдауға шамамен 400 млрд теңге қаражат бөліп отыр. Шындығына келгенде мүлде табыс көзінсіз қалған отбасы үшін 42 500 теңге де қажет қаражат. Төтенше жағдай кезінде мемлекеттің экономиканы қолдау шараларының ішінде шағын және орта кәсіпкерлікті қолдауға бағытталған бастамаларды, әсіресе салықтық демалыс жариялаудың маңызды қадам болғанын айта кету керек. Сонымен қатар Еңбекақы қорына қазан айына дейін төлем жасамау туралы қабылданған шешім аса орынды. Енді жұмыс берушілер осындай жеңілдіктерді пайдаланып, өз жұмысшыларын қысқартпауға әрекет жасайды. Бұл белгілі бір дәрежеде жұмыссыздықтың алдын алу қадамы деп қабылдағанымыз дұрыс. Бұған қоса ауыл шаруашылығы саласын қолдауға 200 млрд теңге бөлінді. Алдын ала бағасы есептелініп, фермерлердің қанша өнім көлемін беретінін, оның қандай бағада сатып алынатынын анықтайтын келісім жасалды. Бұл ертеңгі күні азық-түлік өнімдерінің бағасын тұрақтандыруға негіз болатын бастама болмақ. Осы бөлінген қомақты қаражаттың тиынына дейін қажетті шаруаның, расымен мұқтаж азаматтардың қолына жетуі ендігі маңызды міндет. Бұл жолы бармақ басты, көз қысты әрекеттерге жол беруге болмайды.
Мақсат ХАЛЫҚ,
GSB UIB бизнесті талдау орталығының сарапшысы, экономист