Алматыдағы ҚР Президенті Іс басқармасының медициналық орталығында ашық есік күні өтті. Игі шараға 500-ден астам алматылықтар қатысып, клиниканың үздік профессорлары мен дәрігерлерінен тегін кеңес алды.
Алматыдағы ҚР Президенті Іс басқармасының медициналық орталығында ашық есік күні өтті. Игі шараға 500-ден астам алматылықтар қатысып, клиниканың үздік профессорлары мен дәрігерлерінен тегін кеңес алды.
Соңғы жылдары мұндай акция өткізуді аталмыш орталық дәстүрге айналдырған. ҚР Президенті Іс басқармасы медициналық орталығы бас дәрігерінің емхана жөніндегі орынбасары Шолпан Аюпованың айтуынша, бұған дейін ашық есік күні жылына екі рет өткізілсе, алдағы уақытта үш рет ұйымдастыру жоспарда тұр екен.
Бұл жолы денсаулықтарын тексертіп, дәрігерлердің қабылдауында болған келушілерге 41 арнаулы маман қызмет көрсеткен. Олардың барлығы дерлік орталықтың жетекші мамандары. Мұндағы дәрігерлердің дені жылда арнайы семинарларға қатысып, шетелдерде тәжірибелерін арттырып, біліктіліктерін шыңдаған кәсіби мамандар. Оның үстіне бүгінде орталық заманауи технологиялармен, құрылғылармен жабдықталған. Сондықтан да, келушілер бір емес, екі-үш маманға қаралып, өздеріне көрсетілген қызметке көңілдері толып, риза болып қайтуда.
Сонымен қатар, акцияда ультрадыбыстық диагностика, рентген, кардиограмма, зертхана, т.б. қызметтерге 50 пайыздық жеңілдік жасалды. Ал бірнеше медициналық фирмалар қант мөлшерін, холестеринді тегін анықтап берді.
– Ашық есік күні өте жақсы ұйымдастырылған. Маған, әсіресе, орталық дәрігерлерінің келушілерге деген ықыласы ұнады. Оларға көп рахмет. Бәрі де ілтипатпен қабылдап, білімді, білгір маман ретінде сауатты кеңес беріп, риза болып қайтып барамыз, – деді орта жастағы қала тұрғыны Н.Г.Тимофеева. Ал өзін Рашида Мәжитқызы Исмайылова деп таныстырған апай мұндай жақсылық хабарды құрбысынан естігенін, оны таңғалдырғаны адам көп жиналса да акцияның ың-шыңсыз, тәртіппен, жауапты өткенін басылым бетінде жеткізуді өтінді.
Гүлзейнеп СӘДІРҚЫЗЫ,
«Егемен Қазақстан».
АЛМАТЫ.