Төтенше жағдай режимін қамтамасыз ету жөніндегі өңірлік жедел штабтың хабарлауынша, бұлардың бәрі – науқаспен жақын қарым-қатынаста болғандар мен байланыс жасағандар. Осы кеніште індетке шалдыққан алғашқы жұмысшы анықталған соң, 16 сәуірде Теңіз кенішінен шұғыл емес персоналдарды шығару басталған еді. Кеніштен 17 000-нан астам жұмысшыны шығару жоспарланып отыр.
– Олардың арасында Атырау облысының 6 000-нан астам тұрғыны, Ақтөбе және Батыс Қазақстан облыстарынан 2 000-нан астам, ал, Маңғыстау облысының 600-ден аса тұрғыны бар. Қалған қызметкерлер Қазақстанның өзге де өңірлерінен келген мамандар, - деп хабарлады жедел штаб.
Қазір кен орынан 10 мыңнан астам жұмысшы шығарылды. Оның ішінде 4 мыңға жуық жұмысшы әуе жолымен, 3 мыңға жуығы темір жол қатынасымен, 3 мыңнан астамы автобус көлігімен тасымалданды. Өзге жұмысшыларды шығару 5 мамырда аяқталады деп күтілуде.
Осы кезге дейін Теңіз кенішіндегі жұмысшылар арасында қауіпті індетті жұқтырғандар саны 71 адамға жетіп отыр. Олардың он екісі жазылып шықты. Науқастармен байланыста болған 1,5 мыңнан астам жұмысшы анықталды. Оның ішінде 847 адам жақын қарым-қатынаста болса, 718 адам байланыс жасаған екен.
