Мемлекет тарапынан шағын және орта кәсіпкерлікті қолдау мақсатында шаралар ұйымдастырылып жатқанынан хабардармыз. Бұл туралы жуырда Президент Қ.Тоқаевтың «Egemen Qazaqstan» газетінде жарияланған сұхбатында жан-жақты айтылыпты. Дегенмен жасалған жеңілдіктерден кейбір салалар тыс қалуда. Мысалы, біліктілікті арттыру орталықтары сол қатарда. Жеңілдіктер мен көмектер барлығына бірдей ортақ жүзеге асырылса деген ұсынысымыз бар.
Министрліктер барлығына бірдей көзқараспен қарап қолдау білдірсе, соның өзі кәсіпкерлер үшін зор көмек болар еді. Мен мемлекеттік сатып алулар туралы немесе қаржыландыру туралы айтып отырған жоқпын. Кейбір компанияларға мемлекеттің қаржысы емес, «Жарайсың, осы бағыттан тайма!» деген қолдауы маңызды. Елімізде кәсіпкерлер көбейсе, жаңа жұмыс орындарының ашылуына ықпал жасайды.
Біздің мекемеміз онлайн білім саласында қызметтер көрсетеді. Онлайнға деген көзқарас осыған дейін дұрыс болмаған. Бірақ заман талабы онлайн білім беру мен қызмет көрсету екенін уақыт көрсетіп отыр. Оны еліміздегі төтенше жағдай бірнеше есеге жеделдетіп жіберді.
Жас кәсіпкерлердің көпшілігі IT саласында. Startup жобаларға да көңіл бөлінсе, инновациялық ақыл-ой еңбектері мыңдаған адамды жұмыспен қамтуға қауқарлы болар еді. Бүгінгі таңда еліміздің ең басты ресурсы шикізат емес, азаматтардың ақыл-ойы деп білемін.
Берікбол ТӨЛЕГЕН,
«SKILLS ACADEMY» ЖШС директоры
