Әр жылдары «Номад», «Снежные барысы», «Торпедо-Қазцинк» командаларында шеберлігін шындаған 24 жастағы Қарағандының тумасы «Барыстың» сапында да айшықты өнерімен көзге түсті. ҚХЛ-дың тұрақты чемпионатында 60 рет мұз айдынына шыққан шабуылшы 17 гол соғып, 15 мәрте нәтижелі пас берді. Барлығы – 32 ұпай. Одан бөлек, ол Қазақстан құрамасы сапында жасөспірімдер мен жастар арасындағы әлем біріншіліктерінде бес рет бақ сынады.
Бүгінгі таңда Никита Михайлиске «Авангард», «Автомобилист» және «Салават Юлаев» секілді клубтар «құда түсуде». Егер жерлесіміз айтулы командалардың біріне ауысатын болса, онда ол өтемақы ретінде «Барыстың» есепшотына 180-200 миллион теңге (шамамен 470 мың АҚШ доллары) аударуға тиіс.
