Менің әскери өмірге қадамым осыдан тұп-тура сегіз жыл бұрын басталды. 2012 жылы Алматыдағы Құрлық әскерлерінің әскери институтына қабылданып, команда-тактикалық танк әскерлері мамандығы бойынша білім алдым. Төрт жылдан соң 2016 жылы аталған институтты алтын медальмен тәмамдап, Елбасы – Тұңғыш Президент Нұрсұлтан Назарбаевтың қолынан лейтенант атағын алдым. Сол жылы взвод командирі ретінде Десанттық-шабуылдаушы әскерлерінің қолбасшылығына қарасты 12740 әскери бөліміне келдім. Осы әскери бөлімде күні бүгінге дейін қызмет етіп келемін. Бүгінде шабуылдаушы танк ротасының командирімін.
Мемлекет тарапынан әскери қызметшілерге қомақты қолдау көрсетіліп, сарбаздардың тұрмыс-әлеуеті де жақсарып келеді. Оған – өзім де куәмін. Мәселен, 2017 жылы Қорғаныс министрінің қолынан Сарыөзекте жаңадан соғылған тұрғын үйден екі бөлмелі пәтердің кілтін алдым. Отбасын құрып, бала өсіріп отырмыз.
Қазақстан әскерінің қазіргі қауқарын біздің әскери бөлімнің жетістіктеріне қарап-ақ бағамдауға болады. Айтайын, шабуылдаушы танк батальонының командирі, майор Жанат Қуанышев 2013 жылы Мәскеуде өткен танк биатлонында жүлделі 2-орыннан көрінді. 2018 жылы Қазақстанның Құрлық әскерлері арасында өткізілген «Мергендер батальоны» сайысында біздің батальон 3-орынды иеленді. 2015 жылы және 2019 жылы батальонымыз «Айбалта» жауынгерлік оқу-жаттығуларында үздік көрсеткішке қол жеткізді. Өткен жылы шабуылдаушы танк ротасының сержанты Азат Шойынбаев Мәскеуде өткен танк биатлонында 2-орынды жеңіп алып қана қоймай, «Әлемнің үздік көздеушісі» атағын иеленіп, Қазақстанға оралған соң ІІ дәрежелі «Ел қорғаны» медалімен марапатталды. Мен де осы тектес сайыстарға бірнеше рет қатысып, көзге түстім. Мәселен, 2018 жылы Десанттық-шабуылдаушы әскерлерінің роталары арасында «Танк ротасының үздік командирі» марапатын иелендім.
Бұл жетістіктер бір ғана әскери бөлімнің, батальонның ғана емес, бүтін бір Қазақстан әскерінің жетістігі ретінде бағаланды деп білемін. Ел әскерінің күн санап артып келе жатқан әлеуеті алдағы уақытта бұдан зор асулардан асатынына сенімдімін.
Серік АЙТБЕКОВ,
Десанттық-шабуылдаушы әскерлері қолбасшылығына қарасты 12740 әскери бөлімінің шабуылдаушы танк ротасының командирі
