Қалалық әкімдіктің жанынан арнайы құрылған жұмысшы топ жуырда ғана қаладағы сауда дүкендеріне рейд жүргізген болатын. Әлеуметтік маңызы бар азық-түлік тауарларының бағаларына мемлекеттік бақылау жүргізу барысында Тараздағы 2 дүкенде қарақұмық, күріш, жұмыртқа, тұз бағаларының шекті бағадан асып тұрғаны анықталған.
Аталған дүкен басшылары Әкімшілік-құқықбұзушылық туралы Кодекстің 202-бабына сәйкес әкімшілік жауапкершілікке тартылып, оларға жалпы көлемі 555 мың 600 теңгені құрайтын айыппұл салынды.
Айта кетейік, ағымдағы жылғы 3 сәуір күнгі еліміздің сауда және интергация министрлігі, ауыл шаруашылығы министрлігі және Ұлттық экономика министрлігі сияқты құзырлы орындардың «Әлеуметтік маңызы бар азық-түлік тауарларының шекті бөлшек сауда бағаларын енгізу туралы» Бірлескен бұйрығымен әлеуметтік маңызы бар 9 азық-түлік тауарларының шекті бағалары белгіленген болатын. Осыған орай, Тараз қаласы әкімінің биылғы жылғы 22 сәуір күнгі «Әлеуметтік маңызы бар азық-түлік тауарларына шекті бөлшек сауда бағаларына мемлекеттік бақылау жүргізу мақсатында жұмыс тобын құру туралы» №47-ө өкімімен шекті бағаларға бақылау жүргізетін жұмыс тобы құрылған еді. Бүгінде аталған жұмысшы топ қаладағы дүкендерді аралап, бағаларды бақылауға алу жұмыстарын жүргізуде.
Жамбыл облысы
