Кеше Премьер-Министр Серік Ахметов Ресей Федерациясының Сочи қаласында өткен Ұжымдық қауіпсіздік шарты ұйымының Ұжымдық қауіпсіздік кеңесі сессиясына қатысты.
Кеше Премьер-Министр Серік Ахметов Ресей Федерациясының Сочи қаласында өткен Ұжымдық қауіпсіздік шарты ұйымының Ұжымдық қауіпсіздік кеңесі сессиясына қатысты.
Сочи – 2014 жылы қысқы Олимпиада өтетін орын ретінде бүгінде бүкіл әлемге әйгілі қала. Онда қазір алдағы ақпанда болатын осынау ірі спорттық шараға дайындық жұмыстары қызу жүріп жатыр. Кеше Үкімет басшысы С.Ахметов сапарының басын осында Олимпиада қарсаңында салынып жатқан бірқатар спорттық нысандарды аралаудан бастады. «Большой» мұз сарайына атбасын бұрып, «Адлер-Арена» коньки кешенін барып көрді. Сондай-ақ, «Айсберг» мұз спорт сарайын аралады. Премьер-Министр Сочидің Олимпиадаға дайындығын жоғары бағалады. Ойындардың биік деңгейде өтетініне күмәнсіз екенін айтып, Олимпиада өткізуге табыс тіледі.
С.Ахметовтің аталмыш спорт нысандарына арнайы баруы тегін емес. Себебі, болашақта қысқы Олимпиада ойындарын өз елінде өткізуге Қазақстанның да үміті бар. Әрине, Астанада Азиада ойындарын ойдағыдай өткізген ел алдағы уақытта Алматыны да Олимпиада ойындарының алаңына айналдыра алар еді. Бұл жөнінде Елбасы да жиі айтып жүр. Алматыда әлемдік шараны өткізуге мүмкіндік мол, қолайлы жағдай бар деген болатын Президент бір сөзінде. Тек ұйымдастырушылар тарапынан қолдау тапса болғаны.
Сонымен, С.Ахметов кеше түске дейін Сочидің спорт нысандарын аралап, күннің екінші жартысында Ұжымдық қауіпсіздік кеңесінің сессиясына қатысты. Сессия отырысына ұйымға мүше мемлекеттер басшылары – Ресей Президенті Владимир Путин, Армения Президенті Серж Саргсян, Белоруссия Президенті Александр Лукашенко, Қырғызстан Президенті Алмаз Атамбаев, Тәжікстан Президенті Эмомали Рахмон түгел келіпті. Ал С.Ахметов Президенттің тапсырысы бойынша Қазақстан атынан барды.
Сессия жұмысы алдымен шағын құрамдағы кездесуден басталды. Онда президенттер жеке-жеке сөз алып, Ұжымдық қауіпсіздік кеңесі жұмысына қатысты ұсыныстары мен ойларын ортаға салды. Қазақстан Президенті атынан С.Ахметов сөйледі. Сөз басында сессияны ұйымдастырушылар мен ұйым төрағалығындағыларға Елбасы Нұрсұлтан Назарбаевтың алғысын айтып, сәлемін жеткізді. Одан әрі Ұжымдық қауіпсіздік шарты ұйымының күн тәртібінде тұрған өзекті мәселелерге орай Қазақстанның ұстанымдарын жеткізді. Қазақстан Ұжымдық қауіпсіздік шарты ұйымының дамуына ерекше ықыласты екендігін айтып, ұйым алдында тұрған маңызды мәселелер – Ауғанстан ахуалы, «Талибан» қозғалысына қатысты жағдайлардың Орталық Азияның 2014 жылдан кейінгі дамуына кері әсерін тигізетіні жайында ойлантатынын атап өтті. Қазақстан қазіргі таңда болып жатқан жаһандық жағдайларға қатысты Ұжымдық қауіпсіздік шарты ұйымының ұстанған бағыттарын қолдайтынын айта келіп, Сириядағы жағдайға байланысты Қазақстанның ұстанымын жеткізді.
«Біз Сириядағы және оның айналасындағыларға қатысты қабылданған мәлімдемелердің бәрін қолдаймыз. Қазақстандық тарап сириялық биліктің химиялық қаруды халықаралық қадағалауға беру туралы шешімі ондағы қантөгіс қақтығыстарды тоқтатып, Сириядағы жағдайды тұрақтандыруға септігін тигізеді деп үміттенеді. Бұл ретте «Женева-2» конференциясының өтуі Сирияның саяси жағдайына қатысты мәселелерді ынтымақтастық тұрғыда, ашық пікірлесе отырып шешуге мүмкіндік береді деп есептейміз», деп атап өтті С.Ахметов.
Сессия жұмысы бұдан әрі кең құрамдағы отырыспен жалғасты. Шағын құрамды отырыста көтерілген мәселелер ауқымды түрде талқыланды.
Ұжымдық қауіпсіздік шарты ұйымы – әскери-саяси саладағы ТМД мемлекеттерінің басын біріктіріп тұрған маңызды құрылым. Құрамында Қазақстан, Армения, Беларусь, Қырғызстан, Ресей, Тәжікстан сынды алты мемлекет бар.
Ұйым өткен жылы он жылдығын атап өткен болатын. Он жылдың ішінде бұл ұйым екінші НАТО атанбаса да, аймақты қойып, әлемдік деңгейде айрықша орны бар құрылымға айналды деуге негіз бар. Бастапқыда лаңкестікпен күресіп, есірткі саудасын құрықтау үшін құрылған ұйым өзінің онжылдық тарихында елдер қауіпсіздігін қамтамасыз ету жолында біраз жұмыс атқарды.
Он жылдық дамуды артқа тастаған Ұжымдық қауіпсіздік шарты ұйымы қазіргі таңда өзінің жаңа даму жолына түсті десе болатындай. Яғни өткенді бағалап, кемшін тұсты саралай келе, заманауи талаптарға сай маңызды шараларды қолға алды. Естеріңізде болса,
