«2020 жылғы қаңтар-сәуір бойынша елдің экономикалық дамуы тауарлар өндірісі бойынша 5,8 пайызға өсті. Сонымен қатар көрсетілетін қызметтер 4,8 пайызға азайды. Осының нәтижесінде жалпы ішкі өнім 0,2 пайызға төмендеді. Қызметтер саласындағы төмендеу қабылданған карантиндік шектеулермен байланысты. Жылдық инфляция 6,8 пайызды құрады. Өндіріс секторындағы өсу - 7 пайызға, кен өндірудің өсуі - 6 пайызға, құрылыс саласы - 5,5 пайыз, ауыл шаруашылығының 2,2 пайызға өсуі байқалды», деді Руслан Дәленов.
Оның айтуынша, қызметтер секторы 4 пайызға төмендеген.
«Оның ішінде көлік секторы 11 пайызға, сауда 8,9 пайыз, әкімшілік қызмет көрсетулер 4 пайыз, жылжымайтын мүліктерде жасалатын операцияларда 2,7 пайызға төмендеді. Бұл ретте байланыс қызметтері қаңтар-сәуірде 9,6 пайызға артты. Егер сәуірді жеке қарайтын болсақ, карантиндік ай өткен жылмен салыстырғанда, көрсетілетін қызметтер саласы 17,5 процентке төмендеді. Атап айтқанда сауда және көлік 3,1-ге, әкімшілік қызмет көрсету 22,5 процентке, және жылжымайтын мүліктермен жасалатын операциялар 9,9 пайызға төмендеді. Бұл төмендеулер карантиндік шектеулермен байланысты», деді ол.
Сондай-ақ сыртқы сауда 21 млрд долларды құраған. Экспорт 4,2 пайызға ұлғайып, 13,9 млрд долларға жетті. Бұл ретте импорт 7,1 млрд долларға дейін төмендеді. Сауда балансының сальдосы өткен жылғы бірінші тоқсанмен салыстырғанда 9 пайызға артып, 6,8 млрд доллар болды.
