Испанияның Посоондо муниципалитетінде нөсер жауды. Кешкі сағат 18.00 шамасында бір шаршы метрге 45 литр көлемінде жауын жауған. Аз уақытта қала көшелері суға толды. Соққан дауыл көршілес мекендерде бұршаққа ұласты.
Сауд Арабиясының солтүстігінде орналасқан Хафр-эль-Батин қаласында жылдамдығы 100 км/сағ шаң-тозаңды боран тұрды. Қарқыны қатты болғаны сонша қалада бірқатар ғимарат қирап, көліктер төңкеріліп қалған. Бастысы жергілікті халық зардап шекпеген.
Францияның батысында найзағай ойнап, нөсер жауды. Салдарынан 100-ге жуық дүкендер мен тұрғын үйлер су астында қалған. Табиғи апатпен күреске 28 құтқару орталықтары құрылып, 156 өрт сөндіруші жұмылдырылды. Осы секілді ауа райы 9 мамырда Парижде де болған.
Тағы бір шаң-тозаңды боран Ирактың Аль-Анбар аумағында соқты. 5 метр қашықтыққа дейін айналаны көру мүмкін болмады. Жалпы қазір Ирактың көп бөлігінде құрғақшылық. Мамандар соңғы кездері мұндай шаң-тозаңды боранның Ирак пен Иран аймағында көбейіп кеткенін айтып отыр.
Индонезияның Чимахи қаласында нөсер жауып, су тасқынына алып келді. Кейбір жерлердегі су деңгейі 1 метрге дейін жеткен. Тұрғын үйлер мен көліктер зардап шекті.
Бельгияның Антверпен қаласында жылыжай шаруашылығына жақын жерде құйын тіркелді. Зардап шеккендер болмаған.
Ресейдің Пермь өлкесінде сел жүрді. 100-ден астам үй су астында қалып, 200-дей адам эвакуацияланған.
