Мұнан кейін, облыс әкімі жазушы Әбдіжәміл Нұрпейісов атындағы Әдебиет үйінде болып, Оқушылар үйінің құрылысы және осыдан 2 жыл бұрын пайдалануға берілген ауданаралық орталық ауруханасы жұмыстарымен танысты.
Сапар барысында облыс әкімінің төрағалығымен ауданның әлеуметтік-экономикалық дамуына арналған мәжіліс өтті. Онда Гүлшара Әбдіқалықова бірқатар көрсеткіштердің төмендегенін айтты.
- Ауданда өнеркәсіп өндірісі 5,5 пайызға, өңдеуші өнеркәсіп 7,5 пайызға, кәсіпкерлік саласы бойынша көрсеткіш 2 пайызға төмендеген. Тек ауыл шаруашылығындағы өнім өндірісі 2 пайызға, тұрғын үйлерді пайдалануға беру 48,9 пайызға өскен. Бірақ, бұл нәтижелер көңілге қонымды емес, себебі, экономиканың негізгі көрсеткіштері төмен,- деді облыс әкімі Г.Әбдіқалықова.
Арал ауданында «Жұмыспен қамту жол картасы» бағдарламасы шеңберінде бөлінген қаржыға 16 жоба іске асуда. Оның ішінде Арал қаласының жолдарын орташа жөндеу, аудандық маңызы бар автомобиль жолын, Сексеуіл кентіндегі 300 орындық мектеп құрылысын салу, орталық көшелерді абаттандыру, Арал қаласындағы ауылішілік көшелерге газ құбыры жүйелерін жеткізу секілді ірі жобалар қарастырылған. Өңір басшысы «Жұмыспен қамту жол картасы» бағдарламасы аясында бөлінген қаржыны тиімді жұмсауды тапсырды.
Мұнан соң облыс әкімі Жақсықылыш кентіндегі «Аралтұз» зауытымен, ондағы кальцилендірілген сода шығару инвестициялық жобасының жүзеге асырылу барысымен, «Батыс Еуропа – Батыс Қытай» халықаралық көлік дәлізі бойындағы «С» және «Д» санатты жол бойы сервис кешені мен Қамбаш ауылындағы олимпиадалар және қосымша білім беру орталығының жұмысымен танысты.
Аманөткел ауылы тұрғындарының өзекті мәселелері Хан елді мекені тұсындағы қалқымалы көпірдің қызметі. Гүлшара Әбдіқалықова аудан әкімі М.Оразбаев пен облыстық жолаушылар көлігі және автомобиль жолдары басқармасының басшысы М.Тілеумбетовке өткелдің жұмысын қамтамасыз етуді тапсырды.
Сондай-ақ, аймақ басшысы Жаңақұрылыс ауылындағы №74 орта мектебіне барды.
Бүгін облыс әкімінің сапары Қазалы ауданында жалғасады.
