«Алла қаласа, осы аптадан бастап жеке құлшылық жасап, Құран оқытып, неке қидыруға ниет білдірген азаматтар үшін мешіттерімізді ашамыз. Бұл – еліміздегі барлық мешіттің есіктері ашылады деген сөз емес. Өйткені әрбір облыстағы карантиндік жағдай деңгейі әртүрлі. Бас санитарлық дәрігердің карантиндік режімнің кезеңдік талаптарын сақтау бойынша қаулысын ұстанудамыз. Сонымен қатар өңірлердің коронавирустық инфекцияның таралуына жол бермеу жөніндегі жедел штабтың қаулысына сәйкес жұмыс жүргіземіз. Осыған орай, облыстағы мешіттеріміздің ашылуы сол өңірлердегі коронавирустық инфекцияның таралуына жол бермеу жөніндегі жедел штабтың қаулысына сәйкес жүзеге асырылады. Ал карантин талаптарын сақтау үшін жамағатпен оқылатын бес уақыт, жұма, тарауық намаздарына қатысты қойған уақытша шектеуді өз күшінде қалдырып отырмыз. Жамағатпен оқылатын намаздардың мерзімін алдағы уақытта қосымша хабарлаймыз. Қасиетті кітабымыз Құранда: «Расында, қиындықпен бірге жеңілдік бар. Алла сендерге жеңілдік қалайды», делінген. Міне, Аллаға шүкір, елімізде төтенше жағдай мерзімі аяқталып, халқымыз қалыпты өмір тіршілігіне ауыса бастады. Алайда карантин режімінің талаптарын қатаң сақтап, сақтық шараларына аса мән беруіміз қажет. Осы ретте, мына талаптарды орындауға шақырамын, мешітке келуші барша жамағатты медициналық маска және қолғап киіп келуге, антисептик құрылғысын жиі қолдануға, жеке құлшылық жасау кезінде бір жарым метр арақашықтықты сақтауға, Құран оқитын бөлмеге бір жарым метр арақашықтықты сақтай отырып, 10 адамнан артық кірмеуге, неке қидыратын бөлмеге 4 адамнан артық кірмеуге. Мешіт имамдарының кеңесіне құлақ асып, мешітке лек-легімен кезекпен кіруге, мешітте 15 минуттан артық болмауға шақырамын. Бұл мешіт ауасын әр 3 сағат сайын таза ауамен алмастырып отыруға мүмкіндік береді», деді Бас мүфти.
Сонымен қатар ол Қадір түні мамыр айының 19-нан 20-на қараған түнге сәйкес келіп отырғанын жеткізіп, бұл түнді үйде қарсы алу қажеттігін айтып өтті.
«Биыл қасиетті Рамазан айының карантин жағдайында өтіп жатқанын өздеріңіз көріп отырсыздар. Бұл жағдай сауапты амалдар мен игі шараларға кедергі келтірмеді. Мешіт тарапынан 100 мыңға жуық көмекке мұқтаж отбасына қайырымдылық жасалды. Ауызашар асы әлі күнге дейін тегін таратылуда. Сауаптар еселеніп жазылатын берекелі айда игі іске атсалысқан барша азаматқа айрықша алғысымды білдіремін. Алла разы болсын! «Қайырымдылық жасасаң – қайырын өзің көресің» деп халқымыз айтқандай, игі амалдың сауабы еселініп, қайырын өздеріңіз көріңіздер деп тілеймін. Біз осынау игі жұмыстармен шектелмей, Мақтаарал ауданындағы жерлестерімізге әр облыстағы мешіттердің қолдауымен азық-түлік тиелген жүк көліктерін жібердік. Қаржылай да қолдау көрсеттік. Біз бүгін «Зекет» қорының ұйымдастыруымен, облыстағы мешіттердің атсалысуымен 10 миллион теңге қаржылай көмекті «Түркістан корпоративтік әлеуметтік даму қорына» аудардық. Сонымен қатар 30 тонна ұн жеткізетін боламыз. Алла қаласа, Мақтаарал ауданындағы баспанаға аса зәру екі отбасыға екі үйдің кілтін табыстаймыз. Төтенше жағдай кезінде Қазақстан мұсылмандары діни басқармасының қабылдаған шешіміне түсіністік танытып, оразаны оқшау түрде өткізіп, үйде құлшылық етіп жатқан баршаңызға өз атымнан тағы да алғысымды жеткіземін», деді Наурызбай қажы Тағанұлы.
