Облыстық әкімдіктің мәліметінше, нәтижесінде, өңір жұртшылығының 1300 байланыс нөміріне жіберілген сұрақ-сауалдарына жауап беріліп, өтініштері орындалды. Бұл Жедел әрекет ету орталығының тиімділігін көрсетті. Мамандар тұрғындардан қоңырауларды қабылдап қана қоймай, өздері қайта хабарласып, мәселенің шешілу барысын бақылауда. Сонымен бірге, қаладағы 109 бірыңғай байланыс орталығы да қосылып, карантиндік шараларға қатысты өтініш-шағымдар қабылдануда.
-Жалпы тұрғындардан менің және әкімдіктердің әлеуметтік желілердегі парақшаларына 2079 сұрақ келіп түсті. Олардың ешқайсысы назардан тыс қалған жоқ, деді облыс әкімі Әбілқайыр Сқақов БАҚ өкілдерімен кездесу барысында.
Әр салада қызмет ететін 58 мемлекеттік қызметші жедел орталықтың жұмысына жұмылдырылып, 14 236 өтінішті қабылдады. Ал, Төтенше жағдайға байланысты тұрақты табысынан айырылған 170 200 тұрғынға 42500 теңгеден, «Біз біргеміз» қолдау шарасы аясында 21 899 адамға 50 мың теңгеден төленген. Бұған қоса, 14 778 азаматқа азық-түлік жиынтығы берілді. Осылайша, 200 мыңнан астам өңір тұрғыны мемлекеттік қолдауға ие болды. Дағдарысқа қарсы шаралардың бірі- «Жұмыспен қамту жол картасы» бағдарламасы бойынша облыста жаңадан 12 мыңнан астам жұмыс орны құрылмақ.
Бағдарламаларды іске асыру нәтижесінде 30 мыңнан астам адамды жұмыспен қамту мүмкін болмақ. Сондай-ақ, 1 мың кәсіпкерге «Бизнестің жол картасы-2025», «Қарапайым заттар экономикасы» бағдарламалары аясында көмек көрсетіледі.
Ал, «Жұмыспен қамту жол картасы» бағдарламасы жобаларының іске асу барысы басты бақылауда болады.
Бюджеттің әр теңгесі тиімді пайдаланылуы үшін келісімшарт жасалған сәттен нысан пайдалануға берілгенге дейінгі жұмыстың барлығы қатаң қадағаланады.
Павлодар облысы
