Суретті түсірген Ерлан Омар, EQ
Бұл жиынға 205 мемлекеттік, 61 жекеменшік мектептің директорлары қатысты. Қала әкімдігінің мәліметі бойынша, оңтүстік астанада бүгінде 261 мың оқушы білім алуда. Ал биылғы жылы мектеп бітіретін түлектер саны – 9 299. Олардың 8 667-сі мемлекеттік, 632-сі жекеменшік мектеп түлектері.
Биылғы оқу жылы әдеттегідей 25 мамырда аяқталады. 9-11-сынып оқушылары үшін қорытынды аттестаттау өткізілмейді. Негізгі орта және жалпы орта білім беретін мектепті бітіргені жөніндегі аттестаттау ағымдағы бағалардың негізінде жүзеге асатын болады. Орта білім беру ұйымдарының басшыларына электронды журналдардағы бағаларды түзеуге үзілді-кесілді тыйым салынатынын ескерткен қала басшылығы 1-10-сынып оқушылары үшін салтанатты линейкалар қашықтан өткізіліп, 11-сынып түлектеріне аттестат табыстау шаралары 3-4 маусым күндері кестеге сай өтетіндігіне тоқталды. Бұл күндері барлық санитарлық-эпидемиялық талаптар қатаң қадағаланады. Алматы қаласы бойынша 9047 түлек қатысатын Ұлттық бірыңғай тестілеуді 20 маусым мен 5 шілде аралығында өткізу жоспарланып отыр.
Қаланың білім басқармасының басшысы Ләззат Жылқыбаева бүгінгі күні мемлекеттік мектептердің 40 пайызына салмақ түсіп отырғандығын жеткізді. Яғни орын жетіспеушілігі 30 мың орынды құрайды, ал 2020-2022 оқу жылында бұл көрсеткіш 60 мыңнан асатын болады. Мектептердегі орын жетіспеушілігін жыл сайынғы тұрақты өсім және ішкі миграциямен байланыстырған басқарма басшысы 2018 жылы бұл көрсеткіштің орта есеппен 12 мың оқушыға, ал 2019 жылы 17 мың оқушыға өскендігін атап өтті.
«Қала мектептеріндегі орынға тапшылықты азайту үшін 2022 жылға дейін арнайы Білім беру нысандарының жеделдетілген құрылысы бағдарламасы жасалған. Сонымен бірге, қала басшысының «Шекарасыз қала» қағидасын қаперде ұстай отырып, бүкіл қала бойынша білім беру сапасын біртіндеп арттыру міндеті қойылған» деп атап өткен Л.Жылқыбаева қаладағы мектептердің құрылысы «ЖҚЖК» бағдарламасы аясында биыл қала орталығынан шалғайдағы Алатау, Наурызбай және Түрксіб аудандарында 9 мектеп құрылысы басталып, 12900 орынға және 7000 орынға арналған мектептерге 13 жапсарлас құрылыстың жоспарланып отырғандығын жеткізді. Бұл нысандар келесі жылы пайдалануға берілетін болады. Сонымен бірге жергілікті және республикалық бюджет есебінен қаржыландыру мақсатында 1800 орынға шақталған 2 мектептің құрылысы (Мамыр және Нұршашқан шағын ауданында) және 3642 орынға лайықты мектептерге 8 жапсарлас құрылыстары жүргізілуде. Бұл нысандар 2020-2021 жылы іске қосылатын болады. Ал биылғы жылы 5700 орынға шақталып 5 мектеп салынады. Сонымен бірге 600 орынға арналған мектепке жапсарлас 2 құрылыс нысаны жүргізілуде. Нәтижесінде 2020-2021 жылдары 6300 орынмен қамтамасыз етілмек. Сондай-ақ ағымдағы жылы 2240 орынға шақталған 4 жекеменшік мектеп ашу жоспарлануда. Оның екеуі биылғы жылы ашылатын болса, келесі жылы тағы да екеуі жұмысын бастайды. Білім басқармасының басшысы атап өткеніндей, 2020-2021 жылдары 16 мектеп пен 23 мектепке жапсарлас салынған құрылыс 47 463 орынды қамтитын болады. Осылайша келер жылғы оқу басталар кезеңге қарай орын жетіспеушілігі 80 пайызға қысқарады. Орын жүктемесі толғандырып отырған мемлекеттік мектептер 44-ке дейін азаятын болады. Нәтижесінде орын жетіспеушілігі сол кезеңде 12 мыңды құрап, 2021-2022 жылдарға жоспарланған мектептердің құрылысы есебінен азайтылмақ. Ал биылғы жаз мезгілінде №7, 40, 45, 54, 81, 114 күрделі жөндеу басталып, сейсмологиялық күшейту жұмыстары жүргізіледі екен.
Кездесу барысында мектеп оқушылары үшін жазғы демалыс мәселесі қалай болатыны туралы да қаралды. Қазіргі уақытта қала әкімдігі мен Қазақстан Республикасы Адам құқықтары бойынша өкілі Аружан Сайнмен бірлесіп, қала балаларын жаппай спорт, мәдениет және мектептен тыс қосымша білім беру іс-шараларына тарту мақсатында «Жол картасы» әзірленуде. Ал 1 маусымнан бастап Алматыда 1-сыныпқа баратын жеткіншектердің құжаттарын қабылдау басталады. 15 мамырдан бастап дарынды балаларға арналған мамандандырылған гимназияларға, лицейлерге құжат қабылданады.
