Қызмет бәсі жұмыс орындарын құрумен өлшенеді

Аймақтар • 22 Мамыр, 2020

Қызмет бәсі жұмыс орындарын құрумен өлшенеді

11 рет көрсетілді

Елімізде бұдан 11 жыл бұрын, яғни 2009 жылдары орын алған қаржылық дағдарыс кезінде ең алғаш рет қабылданған «Жұмыспен қамтудың жол картасы» бағдарламасы оң нәтиже бергенін іс басында жүрген азаматтар жиі айтып жүр. Пандемия салдарынан бұрын-соңды болып көрмеген жойқын дағдарыс тұсында бұған дейінгі тәжірибеде өзін-өзі толығымен ақтаған бағдарламаның екінші тынысы ашылып отырғаны тек сүйінішті жәйт. Әрі 2020-2021 жылдары тұрғындарды жұмыспен қамтуда әлеуметтік маңызы өте жоғары іске республика бойынша табаны күректей 1 триллион тенге бөлінгені де атап айтуға тұрарлық мәселе.

Темір ҚҰСАЙЫН

Ал Ақтөбе облысында қайтадан жаңғыртылған жол картасына сәйкес бөлінген қаражаттың мөлшері 46,3 миллиард тенгені құрайды. Бұл қомақты сома әртүрлі сипаттағы 302 жобаны жүзеге асыруға негіз қалайды. Әрі шамамен 12 мыңға жуық жаңа жұмыс орнының ашылуына септігін тигізбек. Мұны аз деуге де, көп деуге де болмайды. Белгіленген жұмыс орындарының басым көпшілігі уақытша болса, оның белгілі бір бөлігін тұрақты жұмыс орындары құрамақ.

Қазіргі таңда көрсетілген 302 жобаға түгелге дерлік конкурс жарияланған. Соның ішінде 262 жобаның мердігерлері анықталған. Ал 202 жоба бойынша жұмыс басталып кетіпті. Сонымен бір мезгілде 680 жұмыс орны ашылып, бос жүрген тұрғындардың қабағына қуаныш ұялатқан. Бұл жөнінде газет тілшісіне Ақтөбе облысы әкімінің орынбасары Руслан Хамбаров айтып берді. Осылайша таяу уақытта 12 мыңға жуық адам белгіленген жұмыс түрдеріне толықтай тартылып, оны жыл аяғына дейін атқаратын болады. Жұмыспен қамтудың жол каратсы бағдарламасы аясында 500 жұмыс орны тұрақты түрде сақталып қалады деді ол бұдан әрі.

Тұтастай алғанда бүгінгі күні өңірде тұрғынарды жұмыспен қамту мен жаңа жұмыс орындарын ашу ісі жергілікті атқарушы органдардың басты міндеттерінің біріне айналып келеді. Аудандарда және ауылдар мен ірі елді-мекендерде тұрғындардың жаңа кәсіптерді игеруіне тиісті жағдайлар туғызу, нарықтық қарым-қатынастар талап еткен мамандықтарға қайта әзірлеу, ауыл және аудан әкімдеріне жауапты міндеттер жүктейді. Олардың қызметі алдағы уақытта аталған істі қаншалықты деңгейде ұйымдастыра білуімен бағаланбақ.

Облыс аудандары экономикасының басым бөлігін ауылшаруашылығы саласы құрайды. Әрі бұл саланы бизнесті дамытудың бір көзі деп қарастыруға да болады. Осы орайда бұл секторды одан әрі дамытуға салдыр-салақ қараған, әрі ауылшаруашылығы өндіріс ұйымдастыру ісінде біліктілік пен кәсібилік таныта алмаған әкімдердің өз орындарын босату ықтималдығы жоғары. Бір сөзбен айтқанда аудан және ауыл әкімдерінің қызметі жаңа жұмыс орындарын құра білуімен өлшенбек. Міне, Ақтөбе облысының әкімі Оңдасын Оразалиннің бұл бағыттағы басты ұстанымы осындай болып отыр.

Ақтөбе облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз