Батыс Қазақстан облысында карантин мерзімі ұзартылды

Аймақтар • 23 Мамыр, 2020

Батыс Қазақстан облысында карантин мерзімі ұзартылды

Батыс Қазақстан облысы аумағындағы облыстың бас санитарлық дәрігері Мұхамғали Арыспаевтың қаулысымен карантин режімі 15 маусымға дейін ұзартылды. 15 маусымға дейін аурушаңдық деңгейі 2%-дан төмен болған жағдайда карантин тоқтатылуы мүмкін. Бұл туралы Батыс Қазақстан облыстық тауарлар мен көрсетілетін қызметтердің сапасы мен қауіпсіздігін бақылау департаменті басшысының орынбасары Нұрлыбек Мұстаев айтып берді.

Қазбек ҚҰТТЫМҰРАТҰЛЫ

Жалпы өңір бойынша күні бүгінге дейін 86 ошақтан COVID-19 диагнозымен 370 жағдай тіркелген екен. Соның ішінде 11 адам – 14 жасқа дейінгі балалар. 23 мамыр күнгі аурудың өсімі – 2,8%-ды құрап отыр.

- Жалпы анықталған науқастардың 251-і ауруды сырттан жұқтырған. Бұл барлық науқастың 67,8%-ы. Ал 114 жағдайда індет ауырған адамдармен қарым-қатынас арқылы жұққан. Олардың 63-і – медицина саласының қызметкерлері, бесеуі – полиция қызметкері. Үй жағдайында оқшауланып, отбасы мүшелеріне індет жұқтырған 43 оқиға анықталды. Бүгінгі таңда облыстық жұқпалы аурулар ауруханасында 144 науқас тиісті емін алып жатыр. Провизорлық стационарда – 24, карантиндік стационарда – 217 адам, үй жағдайында – 1208 адам оқшаулануда, - дейді Нұрлыбек Ермекұлы өңірде қалыптасқан эпидемиологиялық ахуалға шолу жасап.

Осы кезге дейін негізінен шекара бекеті мен Орал қаласынан ғана шығып келген ауру ошағы енді аудандарға да тарала бастағаны алаңдатып отыр. Мәселен қазір коронавирус жұқпасымен Ақжайық ауданында 5 жағдай тіркелсе, Бөрлі ауданында – 7 жағдай, Бәйтерек ауданында – 3 жағдай, Сырым ауданында – 4 жағдай, Тасқала ауданында – 10, Теректі ауданында – 1 жағдай тіркелді.

Жалпы өңірде COVID-19 диагнозымен тіркелгендердің 275-і – Батыс Қазақстан облысының тұрғындары. 84 адам – Қазақстан Республикасының өзге аймақтарынан болса, 7 адам – шетелдік екен.

Коронавирусты жұқтырғандардың 182-сі – Ресей Федерациясынан, 68-і – көршілес Атырау облысы аумағынан, ал 1 адам – Германиядан келген.

Екі мәрте тест сараптамасынан өтіп, жазылғандығы анықталған 220 адам қазір ауруханадан шығарылып, өз үйіне жіберілген. Бірақ олар одан әрі үй жағдайында 14 күндік оқшаулану тәртібін сақтауы тиіс.

Өткен тәулікте өңірдегі мұнай өндіруші ең алып компания – Қарашығанақ Петролеум Оперейтинг б.в. компаниясының бір қызметкері COVID-19 диагнозымен ауруханаға түсті. Тексеріс нәтижесі көрсеткендей, ол вахтаға кетер алдында Орал қаласында Теңіз кенішінде вахталық жұмыс істейтін туысымен жолыққан екен. Енді ҚПО компаниясының онымен қарым-қатынаста болған әріптестері түгел оқшауланып, провизорлық бақылауға алынды.

Үй жағдайында оқшауланған азаматтардың салдыр-салақтығы мен жауапсыздығы да індеттің таралуына әсер етіп тұр. Нұрлыбек Мұстаевтың айтуынша, Сырым ауданында «14 күн бойы үйде оқшауландым» деген тұрғынның Орал қаласына келіп-кеткендігі анықталыпты. Яғни оның қанша адамға індет жұқтырып үлгергені белгісіз. Қазір Сырым аудандық санитарлық дәрігерінің қаулысымен аудан аумағында да карантин жарияланды.

Батыс Қазақстан