• 29 Қыркүйек, 2013

Бокс. Жастар. Гауһар Ермекбай – әлем чемпионы!

1 мин

оқу үшін

Egemen Qazaqstan

29-09-13-boxing-bulgaria-2

Болгарияның Албена қаласында кеше, 28 қыркүйек күні түнде мәреге жеткен жастар (1995-1996 жж.) арасындағы әлем чемпионатында қазақстандықтар 1 алтын, 1 күміс және 3 қола медаль жеңіп алды. Бұл туралы Egemennews.kz тілшісі хабарлады. Біздің қыздар арасында 69 килоға дейінгі салмақта өнер көрсеткен Гауһар Ермекбай чемпион атанды. Болгария рингінде 4 ұрыс өткізген ол турнирді 1/8 финалдан бастап, итальян Домизиана Гюлианеллиді талассыз (3:0) жеңді. Ал ширек финалда орыс қызы Анна Бобыреваны 2:1 есебімен тізе бүктірді. Жартылай финалда оған америкалық Саманта Кинчен қарсы тұра алмады – 3:0! Сосын алтын медаль үшін таласта ирланд Кристине Десмондтан бас бәйгені тартып әкетті – 2:1. Біріншілікте 60 килоға дейінгі салмақта еліміздің намысын қорғаған Айдана Арапбаева ақтық айқаста поляк Агнета Ругиелскаға 0:3 есебімен жол беріп алды. Ал қола медальды Алуа Балқыбекова (48 кг), Валентина Хальзова(75 кг) және Анастасия Рылина (81 кг) есімді қыздарымыз қанжығаға байлады. Жалпы, чемпионатта поляк қыздары – 2, ал Болгария, Тайпей, Қытай, Швеция, Қазақстан, АҚШ, Венгрия және Ресей командалары бір-бірден чемпион шығарды. Командалық бірінші орын осыған орай 2 алтын, 1 күміс медалі бар Польша құрамасына бұйырды. Екінші орынға 1 алтын, 2 күміс медальмен Қытай қыздары шықты. Біздің жасақ үшінші орынға тұрақтады. Дамир Қожамқұл.