«Бүгінгі күні Қарулы Күштердің әскери қызметшілері мен республикалық әскери мектеп тәрбиеленушілері – болашақ Отан қорғаушылар үшін Сағадат Қожахметұлы Нұрмағамбетовтың өмір жолы Отанға деген батылдық пен төзімділіктің үлгісі болып табылады. Біз ұлы батырлардың мұрагерлері олардың даңқты дәстүрлерін сақтап, әрі қарай жалғастырамыз деген сенімдемін», – деді Қорғаныс министрінің орынбасары генерал-лейтенант Тимур Дәндібаев.
Сағадат Нұрмағамбетов – ол аңыз адам. Оның өмірбаяны-аты аңызға айналған және қайталанбас адам өмірінің бірегей тарихы. Әскери батырлық пен қайраттылық, офицерлік ерлік пен абыройдың үлгісі.
1941-1945 жж, Ұлы Отан соғысының қатысушы, Кеңес Одағының Батыры, Халық қаһарманы, тәуелсіз Қазақстанның бірінші Қорғаныс министрі Сағадат Нұрмағамбетов 1924 жылы 25 мамырда Ақмола облысы Алексеевка ауданы Еңбек ауылында дүниеге келген. Ол алғашқы Түркістан пулемет әскери училищесін, М. Фрунзе атындағы Әскери академияны, КСРО Қарулы Күштері Бас штабының Әскери академиясы жанындағы Жоғары академиялық курстарды бітірген.
1942 жылы әскер қатарына шақырылды, 1945 жылдың мамыр айына дейін ол соғыс даласында пулемет взводы командирі ретінде, содан кейін пулемет ротасын, атқыштар батальонын басқарды. Краснодар өлкесін, Украина, Молдавияны, Батыс Белоруссияны, Польшаны азат етуге қатысқан.
1945-1946 жылдары Степной әскери округінің жоғары оқу орындары бөлімінің инспекторы болды. Содан кейін әскери академияда оқыды. 1950 жылдан 1984 жылға дейін Түркістан әскери округі жедел бөлімінің аға офицері, мотоатқыштар полкінің командирі, 201-ші мотоатқыштар дивизиясы штабының бастығы, Қазақ КСР Азаматтық қорғаныс штабының бастығы, Орта Азия әскери округі әскерлері қолбасшысының орынбасары, Оңтүстік әскер тобы (Венгрия) қолбасшысының бірінші орынбасары болды.
1990-1992 жылдары соғыс, еңбек және Қарулы Күштер ардагерлері Қазақ республикалық кеңесінің төрағасы, ардагерлер, мүгедектер және әскери қызметшілер істері жөніндегі ҚР Жоғарғы Кеңесі комитетінің төрағасы, ҚР Мемлекеттік қорғаныс комитетінің төрағасы болды.
Тәуелсіз Қазақстанның Қарулы күштері құрыла бастаған жылдары, 1992-1995 жылдар аралығында Сағадат Нұрмағамбетов Қазақстан Қорғаныс министрі болды. Дәл осы уақытта Қазақстан армиясында маңызды реформалар қабылданған, маңызды кез болды. 1993 жылдың мамыр айында оған «армия генералы» әскери атағы берілді. Бір жылдан кейін ел Президентінің Жарлығымен Нұрмағамбетовке «Алтын жұлдыз» сыйлығымен Халық Қаһарманы атағы берілді.
1995 жылдың қарашасында генерал отставкаға шықты, содан кейін Президенттің кеңесшісі болып, бірнеше рет Жоғарғы Кеңестің депутаты болып сайланды.
Офицер Ленин, Октябрь Революциясы, Қызыл Ту, Қызыл Жұлдыз, I, II дәрежелі Отан соғысы ордендерімен, «КСРО ҚК-дегі Отан қызметі үшін» және басқа да көптеген наградалармен марапатталды. «Лицом к огню», «Надежный страж социалистических завоеваний», «Мой передний край», «А в памяти нет тишины» кітаптарының авторы.
Армия генералы Сағадат Нұрмағамбетов 2013 жылы 89 жасында өмірден озды. Алайда, ол туралы естеліктер мәңгі жадымызда қалады. Генералдың ерлігі және батырлығымен қазақстандық әскери қызметшілердің мыңдаған ұрпағы тәрбиеленуде.
