Суретті түсірген Ерлан Омар, EQ
Қазақстан студенттері Альянсының төрағасы Ілияс Түстікбаев кез келген азаматтың өзі оқыған не оқып жатқан білім ордасы туралы сауалдамаға қатыса алатынын хабарлады. Білім алушылар мен түлектердің жауаптары университеттерге берілмейді, яғни құпия сақталады.
«Бұл рейтингінің мақсаты – жоғары оқу орындарында білім алушылар мен түлектер тарапынан тәуелсіз баға беру, абитуриенттерге, жұмыс берушілерге толыққанды ақпарат пен кәсіптік бағдар беру. Мұның мемлекеттік ұйымдардың ресми рейтингісіне қарағанда ерекшелігі – сауалдаманың анонимді өтуінде. Анонимдік сақталатынын білетін қатысушы барынша ашық әрі шынайы жауап беруге тырысады. Соның негізінде жасалған рейтинг университеттерге де жұмысындағы олқылықтардан хабардар болуға мүмкіндік береді. Жауапты негізге алып жұмыс сапасын арттыруға тырысады деген үміттеміз. Білім және ғылым министрлігі мен жоғары оқу орындарына ұсыныстар әзірлеу де жоспарда бар. Өзім Президент жанындағы Жастар кеңесінің мүшесі ретінде кеңес жиналысында да жарияласам деген жоспарым бар», дейді Альянс төрағасы.
Сауалдама сұрақтары жоғары оқу орындарының білім беру бағдарламасы, материалдық-техникалық базасы, сыбайлас жемқорлық, жатақхана, тамақтану орындары, ректораттың ашықтығы сияқты бірнеше бағыттарды қамтиды. Осылайша, оқу орындарының тек білім беру сапасы емес, студенттерге жасалған жағдай да, сабақтан тыс уақытты тиімді өткізуге арналған мүмкіндіктер де сараланады.
«Азаматтардан бұл жобаға белсене араласуын өтінеміз. Бұл жобада әр адамның пікірі маңызды. Сауалдамаға Қазақстан студенттерінің Альянсының әлеуметтік желілердегі парақшалары арқылы қатысуға болады. Бұл университеттерге студенттердің көзімен баға беру екенін ескерген жөн», деп түйіндеді Ілияс Түстікбаев.
Бір айға созылатын сауалдама студенттер тарапынан әзірленіп жатқан алғашқы рейтинг. Бұған дейін жоғары оқу орындарының жұмыс сапасын «Білім сапасын қамтамасыздандыру бойынша тәуелсіз агенттігі» мен «Аккредиттеу және рейтингтің тәуелсіз агенттігі» ұйымдары бағалайтын.
