Бас бапкер Виктор Фахрутдиновтың айтуынша, Ресей құрамасының бірінші және екінші нөмірлі былғары қолғап шеберлері 17 маусымда Мәскеуде бас қосады. Бірер күн медициналық тексерістен өткеннен кейін Қазақстанға сапар шегеді.
«Сол жақта біздер Украина, Өзбекстан және Қазақстанның боксшыларымен бірге бірлескен оқу-жаттығу жиынын өткіземіз. Бұл олар үшін де, біздер үшін де үлкен тәжірибе мектебі болмақ. Себебі, жоғарыда аталған мемлекеттердің барлығының да бокс өнерінде жеңіспен өрілген бай дәстүрі бар», – дейді Фахрутдинов.
Расында да, осындай жиындардың берері көп. Мәселен, былтыр Екатеринбургте өткен әлем чемпионатында 3 алтын және 1 қола медальді олжалаған ресейліктер жалпы командалық есепте екінші орынды иеленді. Олар Өзбекстаннан қалып қойды. Айтулы жарысты өзбектер 3 алтын, 1 күміс және 1 қоламен қорытындылады. Қазақстан үшінші сатыға жайғасты. Жерлестеріміз 1 алтын, 1 күміс және 4 қоланы қоржынға салды. Ал Украинаның боксшылары Ресейдегі додаға қатысудан бас тартқан еді.
