Білім • 26 Мамыр, 2020

Күләш Шәмшидинова Югра түлектерін құттықтады

20 рет көрсетілді

«Назарбаев Зияткерлік мектептері» дербес білім беру ұйымы басқарма төрайымы Куләш Шәмшидинова тікелей эфирде Ханты-Мансийск дербес округі түлектерін құттықтады.

Юграның  қалалары мен ауылдарының он мыңнан астам түлегі өздерінің соңғы сабағында бейнеконференция арқылы кездесті, кейін барлық ресей мектептеріндегідей онлайн форматтағы соңғы қоңырау соғылды.

Ханты-Мансийск дербес округінің губернаторы Наталья Комарова бүгінгі түлектер Ресейдің ең табысты аймақтарының бірі болып саналатын Юграның дамуына өз үлестерін қосатынына сенім білдірді. Бірнеше күн бұрын бұл мекен жұртшылығы 12 миллиард тонна мұнай өндірілгеніне қуанған болатын.

Ресей Федерациясының Мемлекеттік Думасы білім және ғылым жөніндегі комитеті төрағасының орынбасары Любовь Духанина, «Назарбаев Зияткерлік мектептері» дербес білім беру ұйымы басқарма төрайымы Күләш Шәмшидинова, ата-аналар атынан Валентина Сырова және орыс тілі мен әдебиеті пәнінің мұғалімі, «Педагогикалық дебют» аймақтық байқауының жүлдегері Алена Чебекина балаларға сәттілік пен табыс тіледі.

– Білім – адамның кәсіби дамуындағы алғашқы және міндетті қадам, – деп атап өтті Күләш Ноғатайқызы түлектерге арнаған жолдауында: – Өз миссияңызды орындау, сізді қызықтыратын кез келген салада жетістікке жету үшін үнемі өз-өзіңізді жетілдіріп отыруыңыз қажет.

Аймақ губернаторы Наталья Комарова Югра білім беру ұйымдарының қазақстандық әріптестермен ынтымақтастығын жоғары бағалады:

– Сіз білім берудің жаңа дамуындағы біздің жол көрсетуші және жақын достарымызсыздар.

Бүгінде Назарбаев Зияткерлік мектептері тәжірибе тарату аясында Ханты-Мансийск округі білім беру мекемелерімен ынтымақтастық жасайды.

Соңғы жаңалықтар

COVID-19: Хаттамаға өзгеріс қажет пе?

Қазақстан • Бүгін, 09:25

Ел жүрегі – елорда

Аймақтар • Кеше

Ұқсас жаңалықтар