Бизнес • 27 Мамыр, 2020

Ұмтылғандар ұтады

17 рет көрсетілді

Көңіл таразысына салып бажайлап қарасаңыз, тәуекелге бел буып, өз кәсібін дөңгелеткендердің ұмтылысы көпке үлгі боларлықтай. Үйдегі ойдың баянды болуына «Бастау бизнес» бағдарламасының шарапаты тиіп тұрғанын айта кетелік.

Қай  істің тігісін көктесең де, алдымен ұйытқы боларлық алғаш­қы қар­жы қажет екенін кәсіппен айналыс­па­ған­дардың өзі де жақсы біледі. Зерен­ділік Дамира Битенова жоғарыда атал­ған жоба бойынша қыр-сыры мол кәсіп­кер­лік негіздерін тәп-тәуір меңгеріп, же­ке косметологиялық кабинетін аш­ты. Шағын аудан орталығында бұл ай­тарлықтай жаңалық. Жалғыз Да­ми­ра ғана емес, жаңа жылдан бері аудан­­ның 22 адамы өз ісін өрге бастырамыз деп ұмтылып отыр. Құптарлық-ақ қадам.

– Сүйікті ісімді табыс көзіне айналдыру оңай шаруа емес. Менің білуімше, ең алдымен кәсіпкерлік негіздерін қапысыз меңгеруің керек – дейді Дамира Битенова, – әйтпесе, құр ұмтылыс орындалмайтын қиял болып қалуы ғажап емес. Ең алдымен, өзің айналысатын істің қыр-сырын жілігін шағып, майын ішкен маман болуың шарт. Егер өзің білмесең, онда бұл тарапқа қадам басуға болмайды.

Өзі медбике болып жиырма жыл жұмыс істеген екен. Косметология каби­нетін ашқанда да білімі мен білігі­не сүйенген. Жасаған бизнес жос­пары да құрғақ қиялдан құрылмаған. Нақ­ты, өмірдің өзінен ойып алған бағыт­ты қам­тиды. Табыс тетігінің құлағы қыл­тиып тұр­ған соң грант иегері атанған.

– Негізінде бағдарламаның көп көмегі тиді. Өз ісінің хас шеберлері қар­жы­лық сауаттылыққа үйретті. Кәсіп­­кер адамға ол да керек. Біз бұ­рын тіпті са­­лықты қалай төлеу керек екенін де біл­­мей­тін едік қой, – дейді ол, – жеке кәсіп­­кер ретінде тіркелдім, енді ерін­бей еңбек етпекпін.

Грант қаржысына косметология кабинетіне қажетті жабдықтарды сатып алыпты. Бастапқыда құрқыл­тайдың ұясындай кішкентай кабинет бұл күнде қызмет көрсету аясын біртіндеп кеңейтіп келеді.

– 2019 жылы 132 адамға 51 млн теңгенің гранты берілді. Біз болашақ кәсіпкерлерді бір жыл бойы жұмыс істеуге үйреттік. Оның ішінде бухгал­терлік есеп, салық төлеудің тәрті­бі тәрізді есеп-қисап бар, – дейді аудан­дық кәсіпкерлерді қолдау орталығы­ның қызметкері Раушан Омарова.  

«Қолы қимылдағанның аузы қимыл­дайды» деген аталы сөз бар. Бір үміт, бір күдікпен кәсібін бас­таған­дардың ісінің оңынан оң­ғарыл­ғанын көрген зеренділіктердің тарапынан құлшыныс өсіп келеді. Биыл «Бастау бизнес» аясында оқып білім алуға 300-ден астам өтініш түсті. Коронавирус карантиніне байланысты кәсіпкерлік негіздері бойынша оқыту онлайн режімінде өткізілуде. Ұмтылғандардың ұтқанын көрген қалған жұрт та өз кәсібімен айналысатын уақыт алыс емес.

 

Ақмола облысы,

Зеренді ауданы

Соңғы жаңалықтар

Янайкинге “нағыз қазақ”

Аймақтар • Бүгін, 21:48

Атырауда 42 көшеге жол төселеді

Аймақтар • Бүгін, 20:28

Алматы маңында жер сілкінді

Аймақтар • Бүгін, 16:10

Биыл Құрбан айт қалай өтеді?

Қазақстан • Бүгін, 10:17

COVID-19: Жерлеу қалай жүріп жатыр?

Қазақстан • Бүгін, 09:39

Ұқсас жаңалықтар