Аймақтар • 28 Мамыр, 2020

Маңғыстауда мұғалімдер карантин кезінде мектепке шақырылған

1727 рет көрсетілді

Әр дәлелденген жағдай бойынша тиісті тәртіптік шаралар қабылданды. Келешекте олардың алдын алу шаралары жүргізілді. Алайда лауазымды тұлғалар жауапкершілікке тартылған жоқ. Бұл туралы өңірлік қоғамдық коммуникация орталығында өткен жиында Маңғыстау облысы бойынша білім саласында сапаны қамтамасыз ету департаментінің басшысы Есболат Өмірзақ мәлімдеді.

Аталған департаментке сенім телефоны арқылы Жаңаөзен қаласының мектепке дейінгі білім беру ұйымының қызметкері хабарласып, басшысы өзін функционалдық міндетінен тыс жұмыстарға жұмсайтындығы жөнінде шағымданған. Бұл мәселеге құзырлы мекеме өкілдерінің араласуымен шағым қанағаттандырылды.

- Қазіргі уақытта көпшілік жаңалықтарды әлеуметтік желілерден алатындықтан Департамент өз парақшаларын Facebook, Telegram, ал жастар үшін Instagramәлеуметтік желілерінен ашып қойды. Facebook әлеуметтік парақшасына пандемия кезінде 8 сауал келіп түсті, оның 6-уы ата-аналардан, 2-уі педагогтерден. Онда жұмысқа орналасу, жалақы, Ұлттық бірыңғай тестілеудің форматы, мектепке дейінгі ұйымдардың жұмысын қайта бастауы туралы мәселелері қозғалды. Сондай-ақ Telegram әлеуметтік парақшасына бірнеше педагогтен білім беру ұйымы есептілік талап ететіндігі, каникул, төтенше жағдай кезіндегі еңбек ақы және сауықтыру жәрдемақысын төлеу мәселелері жөнінде сауалдар түсті. Әлеуметтік желі арқылы түскен өтініштер мен сауалдарға толық жауап мерзімінде беріліп, қанағаттандырылды. Барлық постқа жазылған пікірлерге, жолданған сауалдарға Департамент тарапынан мониторинг жүргізіліп отыр, - дейді Есболат Кеңғанұлы.

Оның айтуынша, педагогке тауарлар мен көрсетілетін қызметтерді сатып алу бойынша міндетті жүктеу, мемлекеттік орта білім беру ұйымының педагогін өз кәсіптік қызметін жүзеге асыру кезінде мемлекеттік емес ұйымдардың іс-шараларын өткізуге тарту түрінде жасалған бұзушылықтар да тексеріске негіз болады. Аталған нормаларды бұзғаны үшін «Әкімшілік құқық бұзушылық туралы» Кодексінің 409-шы бабына сәйкес бірінші кезекте ескерту жасалады, бір жыл ішінде қайталап жасалынса 20-дан 120-ға дейінгі АЕК мөлшерінде айыппұл салынады. Осыған қарамастан кейбір облыстарда әлі де педагогтерді мектептің ағымдағы жөндеу жұмыстарына, мерзімді баспа басылымдарына жазылуға тарту тәжірибесі және өзге заңға қайшы тәжірибелер кездесіп отыр. 

- Мысалы, инфекциямен күрес науқаны кезінде Түркістан облысының Түлкібас ауданы Жабағалы ауылының әкімшілігі мектеп мұғалімдерін санитарлық постқа тұрғызып қойған. Бізге жеткен ақпаратқа сәйкес әр мұғалім үш күн сайын 12 сағаттан постта тұруға міндетті болған. Мұғалімдерге ешқандай санитарлық құралдар да ұсынылмапты. Осыған ұқсас факт Шығыс Қазақстанда да болды. Әр жағдай бойынша тиісті тәртіптік шаралар қабылданды. Біздің облыста да жоғарыдағыларға ұқсас деректер тіркелді. Бірақ біздің араласуымызмен алдын алу шаралары жүргізіліп, лауазымды тұлғаларды жауапкершілікке тарту фактісі болған жоқ, - деп мәлімдеді брифинг спикері.

Маңғыстау облысының білім саласында сапаны қамтамасыз ету департаменті 2020 жылы І жартыжылдықта жоғары тәуекел дәрежесіне жатқызылған 20 білім беру ұйымында бару арқылы профилактикалық бақылау өткізуді жоспарлады. Ағымдағы жылдың ақпан-наурыз айында 9 білім беру ұйымында профилактикалық бақылау және 12 білім беру ұйымында (10-ы профилактикалық бақылау нәтижесімен берілген нұсқаманың орындалысы, 2-уі жеке тұлға арызы бойынша ) жоспардан тыс тексеру жүргізілді. Республика аумағында төтенше жағдай енгізілуіне байланысты 2020 жылдың 16 наурызынан бастап бару арқылы профилактикалық бақылау және жоспардан тыс тексеру жүргізу уақытша тоқтатылған.

Дүниежүзінің көптеген елдерін алаңдатқан короновирус инфекциясының Қазақстанға да таралуына байланысты Президент жарлығымен ел аумағында төтенше жағдай енгізілуіне орай білім беру саласында биыл үлкен өзгерістер болды. 2020 жылдың 16 наурызынан бастап мектеп оқушылары 1 апта бұрын көктемгі каникулға жіберілді. Каникул кезінде 4 оқу тоқсанынан бастап қашықтықтан оқуға көшуге дайындық жұмыстары жүргізілді.      Білім беру ұйымдарында жүргізіліп жатырған қашықтықтан оқытудың барысын Маңғыстау облысының білім саласында сапаны қамтамасыз ету департаменті қадағалап отыр. Ресми сайты жұмыс жасап тұр, сілтемесі dkcomo.edus.kz.

Департамент сайтына оқырмандарға қажетті мәліметтер мен жаңалықтар мерзімінде жарияланып отыр. Сонымен қатар сайтта педагогтер мен ата-аналар туындаған мәселелері бойынша хабарласу үшін сенім телефондары мен Call-орталық жұмыс істейді.

 

 

Маңғыстау облысы

Соңғы жаңалықтар

Ұқсас жаңалықтар