Дүниеге келген қыз баланың салмағы – 3 кг, бойы – 51 см. Нәрестеден бірден коронавируске талдау алынған. Сәби індеттен дін аман. Қазір бөлек палатада оқшауланып, дәрігерлердің бақылауында. Анасының да жағдайы бірқалыпты. Жас ана инфекциялық бөлімде ем қабылдауда. Бұл оның екінші перзенті. Қауіпті дертке ұшырап, сан ойға кеткен әйел ақ халатты жандарға алғысын жаудыруда. Отаға жетекшілік еткен реанимотолог-дәрігер Ержан Жұмашев тәулік бойы осы инфекциялық госпитальда. Отбасымен алда тағы екі апта көріспейді. «Коронавирус індетіне шалдыққан науқастарға ота жасауда қорғаныш киімдері аздап ыңғайсыздық тудырады. Қалғаны науқастарға көрсететін қалыпты қызметіміз. Біз үшін бұл әйелдің сауығып, перзентін қолына алғаны үлкен қуаныш болады», дейді Ержан Жұмашев.
Айта кетелік, Кентау қалалық ауруханасының дәрігерлері осымен коронавируске шалдыққан екінші науқасты босандырып алды. Түркістан облысы бойынша қауіпті індетті 358 адам жұқтырған. Облыс дәрігерлерінің кәсіби біліктілігінің арқасында 199 науқас ауыр дерттен айығып, үйлеріне оралды.
Түркістан облысы
